南瓜蕃茄三文魚頭冰豆腐湯

前幾天係街市專登買磚硬豆腐回家整冰豆腐 , 起初係諗住用來煮餸 , 但後來突然換作用來煲湯享用 , 原因好簡單 , 只為了它 ~三文魚頭~ ......



三文魚頭我非常非常愛吃 , 不過呢邊街市唔多想見 , 問親急凍店呀姐 , 佢每次都係個幾個答案 ~今日冇番三文魚頭呀 ~ 或者 ~今日買晒喇~ , 有時我諗究竟係咪真係咁好賣呢 ??? 大家可能會同袁太講 , 可以去日式超市買 , 哈 ~~ 我當然知日式超市有得賣 , 但就係因為以往試過係超市買 , 一來比起街市的還要細個 , 二來煲出來冇街市賣的咁好味 , 所以從此三文魚頭我就唔會再去超市買 , 一定要指定急凍店買 , 不過都係用買牛展一樣要睇彩數呢



慶幸某日終於俾我見到有得賣 , 仲要得番兩個咁多多 , 一於買晒佢 , 一個用來煲湯 , 一個留待下次用來煮餸 , 大大個的三文魚頭共係二十五個大洋 , 價錢絕對便宜 , 每次煲三文魚湯我會有特定的煲湯組合



如果係煲三文魚骨 , 我就會配搭蕃茄薯仔 , 如果煲三文魚頭湯 , 我就會配豆漿或者南瓜蕃茄 , 所以今次就會用南瓜蕃茄煲 , 甜甜的南瓜加上微酸的蕃茄 , 味道當然係絕配 , 再加上前幾天係冰箱眠左幾日 , 用硬豆腐整成的冰豆腐 , 冰豆腐吸收晒湯的味道 , 正正正 , 只不過袁生只係會飲湯 , 唔會食魚頭架 , 所以一個大大的三文魚頭就要袁太一個清晒佢 , 食左成個魚頭都飽到食唔落飯呢 ^^



材料 : 長型南瓜 , 蕃茄 , 冰豆腐 , 三文魚頭 , 紅棗 , 薑 , 鹽 , 胡椒粉

三文魚頭洗淨放入器皿內 , 加少許鹽及胡椒粉醃勻魚頭兩面 , 蓋上保鮮紙靜待30分鐘 , 南瓜去皮去籽 , 蕃茄洗淨 , 分別將南瓜切大粒 , 蕃茄切件 , 薑切片 , 紅棗去核

煲內加少許油 , 爆香蕃茄至出茄油後 , 再加入南瓜 , 紅棗拌勻 , 加入適量熱水用中火先煲15分鐘 , 期間燒紅鑊 , 爆香薑片 , 放入三文魚頭煎至兩面金黃色 , 將適量已煮滾的南瓜蕃茄湯倒入三文魚頭內 , 蓋上蓋用中火煮20分鐘至奶白色

將三文魚頭連湯及薑片放入南瓜蕃茄湯拌勻 , 煲滾後蓋上蓋轉慢火煲1 1/2小時 , 期間將冰豆腐用手撕成件 , 用水沖一沖洗及瀝乾

1 1/2小時後加入冰豆腐拌勻蓋上蓋繼續用慢火煲多15分鐘 , 再熄火焗30分鐘即可

材料 
長型南瓜1/2個 , 蕃茄3個 , 冰豆腐1磚 , 三文魚頭1個 , 紅棗4粒 , 薑 , 鹽 , 胡椒粉



做法
1. 三文魚頭洗淨放入器皿內 , 加少許鹽及胡椒粉醃勻魚頭兩面 

2. 蓋上保鮮紙靜待30分鐘 

3. 南瓜去皮去籽 , 蕃茄洗淨 , 分別將南瓜切大粒

4. 蕃茄切件 , 薑切片 , 紅棗去核

5. 煲內加少許油 , 爆香蕃茄至出茄油後 , 再加入南瓜 , 紅棗拌勻 

6. 加入適量熱水用中火先煲15分鐘

7. 期間燒紅鑊 , 爆香薑片 , 放入三文魚頭煎至兩面金黃色 

8. 將適量已煮滾的南瓜蕃茄湯倒入三文魚頭內 , 蓋上蓋用中火煮20分鐘至奶白色

9. 將三文魚頭連湯及薑片放入南瓜蕃茄湯拌勻 , 煲滾後蓋上蓋轉慢火煲1 1/2小時 

10. 期間將冰豆腐用手撕成件 , 用水沖一沖洗及瀝乾 

11. 1 1/2小時後加入冰豆腐拌勻蓋上蓋繼續用慢火煲多15分鐘 

12. 再熄火焗30分鐘即可 




超滿足的一碗湯 , 飽飽呢 ~~~ ^^