[蝦湯底] 素翅鮮蝦雲吞

今晚又唔想食飯 , 想想前排整完蒸餃 , 感覺好滿足後 , 就輪到餃餃的好朋友 "雲吞" 出場 , 唔講大家可能唔知 , 其實袁太唔係太識包雲吞 , 無論上網睇片睇過N咁多次 , 都係包唔掂 ......



不過經過幾次試包之後 , 包雲吞都開始似模似樣 , 其實雲吞的餡料都係離不開蝦同豬肉 , 去街市買左半斤基圍蝦 , 諗住買埋豬肉同韭黃就可以 , 後來突然醒起 , 咁雲吞湯底呢 ??? 如果俾我以前 , 我一定簡單用雞湯就算 , 不過大家都知 , 袁太而家唔食得雞 , 所以雞湯~OUT~ , 每次用
蝦做水餃餡 , 蝦頭蝦殼我都會留起用黎煮湯 , 所以今次亦唔例外 , 用蝦頭蝦殼加蕃茄 , 洋蔥同椰菜煲成蝦湯底 , 味道鮮甜



除左有雲吞 , 蝦湯底之外 , 仲加入素翅放係碗底 , 金金黃黃的素翅 , 令碗淨雲吞當堂升級不少呢 ^^



材料 : 蕃茄 , 豬肉碎 , 木耳絲 , 洋蔥 , 基圍蝦 , 椰菜 , 素翅 , 雞蛋(只用蛋白) , 韭黃 , 蔥 , 黑胡椒碎 , 胡椒粉 , 鹽 , 糖 , 生粉 , 雲吞皮

豬肉碎放入大碗內 , 加入醃料拌勻靜待30分鐘 , 期間將木耳浸水待軟身 , 基圍蝦去頭去殼(留起) , 將蝦肉沖一沖洗後切粒 , 放入碗內加入蛋白 , 少許鹽及胡椒粉拌勻靜待15分鐘 , 韭黃切粒 , 蔥切粒 , 韭黃粒用水沖一沖洗及瀝乾 , 木耳浸至軟身後沖一沖洗 , 蕃茄洗淨切件

煲內放入一半份量蕃茄炒至出茄油 , 加入蝦頭蝦殼炒至轉色 , 加入熱水再煲滾後 , 蓋上蓋用中火先煲20分鐘 , 期間小心滾瀉 , 洋蔥去衣切件 , 椰菜切大件

  

之前醃好的豬肉加入蝦肉 , 木耳絲及2/3份量的韭黃拌勻 , 用手撻十餘下後 , 蓋上保鮮紙入雪櫃靜待30分鐘 , 蝦湯底煲20分鐘後加入椰菜 , 洋蔥及餘下份量的蕃茄拌勻 , 用中火煲滾後轉慢火煲1小時

雲吞餡料取出靜待10分鐘 , 餡料放入雲吞皮中間位置 , 對摺再包成雲吞形狀備用 , 蝦湯底煲好後隔去渣 , 將湯底放回煲內加少許鹽 , 胡椒粉及黑胡椒碎拌勻 , 用中火再煲滾後熄火蓋上蓋焗30分鐘

 

素翅放入大室內加入熱水浸3分鐘再瀝乾水份 , 雲吞放入煲內加水用慢火煮至浮起及熟透 , 先將素翅放入碗底 , 再放上雲吞 , 淋上蝦湯 , 最後灑上餘下份量的韭黃粒及蔥粒即可

材料  
蕃茄3個 , 豬肉碎$15 , 木耳絲 , 洋蔥1個 , 基圍蝦1/2斤 , 椰菜1個 , 素翅 , 雞蛋(只用蛋白)1隻 , 韭黃 , 蔥 , 黑胡椒碎 , 胡椒粉 , 鹽 , 糖 , 生粉 , 雲吞皮

醃料 (豬肉碎)
鹽 , 糖 , 生粉 , 生抽 , 麻油 , 雞粉 , 水



做法
1. 豬肉碎放入大碗內 , 加入醃料拌勻靜待30分鐘 

2. 期間將木耳浸水待軟身 , 基圍蝦去頭去殼(留起) , 將蝦肉沖一沖洗後切粒 

3. 放入碗內加入蛋白 , 少許鹽及胡椒粉拌勻靜待15分鐘 

4. 韭黃切粒 , 蔥切粒 , 韭黃粒用水沖一沖洗及瀝乾 

5. 木耳浸至軟身後沖一沖洗 , 蕃茄洗淨切件

6. 煲內放入一半份量蕃茄炒至出茄油 , 加入蝦頭蝦殼炒至轉色 , 加入熱水再煲滾後

7. 蓋上蓋用中火先煲20分鐘 , 期間小心滾瀉 

8. 洋蔥去衣切件 , 椰菜切大件

9. 之前醃好的豬肉加入蝦肉 , 木耳絲及2/3份量的韭黃拌勻 

10. 用手撻十餘下後 , 蓋上保鮮紙入雪櫃靜待30分鐘 

11. 蝦湯底煲20分鐘後加入椰菜 , 洋蔥及餘下份量的蕃茄拌勻 

12. 用中火煲滾後轉慢火煲1小時  

13. 雲吞餡料取出靜待10分鐘 , 餡料放入雲吞皮中間位置 , 對摺再包成雲吞形狀備用 

14. 蝦湯底煲好後隔去渣 , 將湯底放回煲內加少許鹽 , 胡椒粉及黑胡椒碎拌勻 

15. 用中火再煲滾後熄火蓋上蓋焗30分鐘 

16. 素翅放入大室內加入熱水浸3分鐘再瀝乾水份 

17. 雲吞放入煲內加水用慢火煮至浮起及熟透 

18. 先將素翅放入碗底 , 再放上雲吞 , 淋上蝦湯 , 最後灑上餘下份量的韭黃粒及蔥粒即可 




今次包的雲吞煮完後粒粒都好完整 , 完全冇爆開 , 因湯底用了蝦殼煲 , 鮮甜美味 , 而且加左素翅 , 當堂升級不少呢 ^^