XO醬南瓜鹹蛋肉碎炒飯

平時喜愛食炒飯的我 , 最愛煮定飯放入雪櫃變成冷飯 , 加入簡單的材料就可以有香噴噴的炒飯食 , 記得以前只喜愛加雜豆 , 腸仔呢類材料 , 還有時喜愛配上五香肉丁黎炒飯 , 辣辣地好開胃 ......


不過今次的炒飯主打係用南瓜 , 為何用南瓜??? 好簡單 , 絕對係雪櫃餘貨呢 , 另外加上豬肉碎 , 鹹蛋做配料 , 冷飯完全吸收鹹蛋的香味同南瓜的甜味 , 一路炒的時候已經聞到好香好香的味道 , 呀~~~仲有一樣材料唔記得講 , 就係XO醬喇 , 由於呢個炒飯袁生都會食 , 而XO醬係佢最喜愛的醬料 , 所以就加左少少入去一齊炒 , 一定會變得好惹味



唔好見袁太炒左一大鑊 , 得兩條友會食唔晒喎 , 我地都唔駛5分鐘已經全部K.O晒喇 , 係味好痴線呢 ^^



材料 : 南瓜 , 冷飯 , 豬肉碎 , 粟米粒 , 鹹蛋 , 蒜頭 , 蔥 , XO醬 , 鹽 , 魚露 , 胡椒粉

  

豬肉碎放入大碗內加入少許鹽 , 胡椒粉及魚露拌勻靜待20分鐘 , 醃豬肉期間將南瓜去籽去皮切粒 , 放入電蒸鍋內蒸20分鐘 , 蒸好南瓜後將鹹蛋放入電蒸鍋內蒸15分鐘 , 蒸好的南瓜放入大碗內壓成蓉 , 蒸好的鹹蛋分別將鹹蛋黃及鹹蛋白切粒 , 蔥切粒 , 蒜頭去衣拍扁 , 粟米粒用水沖一沖洗及瀝乾

燒紅鑊 , 將豬肉碎炒至轉色後先盛起 , 原鑊加入鹹蛋黃爆香 , 加入南瓜拌勻炒數分鐘 , 加入冷飯拌勻快炒至每粒飯成南瓜的金黃色(此時飯係會比較濕潤)

將豬肉碎回鑊 , 加入粟米粒拌勻 , 加入XO醬及少許鹽調味拌勻炒至飯開始變回乾身 , 最後加入鹹蛋白 , 蔥粒拌勻略拌勻一下即可

材料 
南瓜1/2邊 , 冷飯3碗 , 豬肉碎$10 , 粟米粒 , 鹹蛋2隻 , 蒜頭1個 , 蔥 , XO醬 , 鹽 , 魚露 , 胡椒粉



做法
1. 豬肉碎放入大碗內加入少許鹽 , 胡椒粉及魚露拌勻靜待20分鐘 

2. 醃豬肉期間將南瓜去籽去皮切粒 , 放入電蒸鍋內蒸20分鐘 

3. 蒸好南瓜後將鹹蛋放入電蒸鍋內蒸15分鐘 

4. 蒸好的南瓜放入大碗內壓成蓉 , 蒸好的鹹蛋分別將鹹蛋黃及鹹蛋白切粒 

5. 蔥切粒 , 蒜頭去衣拍扁 , 粟米粒用水沖一沖洗及瀝乾

6. 燒紅鑊 , 將豬肉碎炒至轉色後先盛起 

7. 原鑊加入鹹蛋黃爆香 , 加入南瓜拌勻炒數分鐘 

8. 加入冷飯拌勻快炒至每粒飯成南瓜的金黃色(此時飯係會比較濕潤) 

9. 將豬肉碎回鑊 , 加入粟米粒拌勻 , 加入XO醬及少許鹽調味拌勻炒至飯開始變回乾身 

10. 最後加入鹹蛋白 , 蔥粒拌勻略拌勻一下即可 




金金黃黃超好味的炒飯 , 袁太一定要推介俾大家呢 ^^