[代代相傳] 大豆芽炒肉鬆

新年的時候 , 袁太已經想買大豆芽 , 不過大家都知 , 新年期間的街市 , 大多數鋪頭都係唔會開呢 , 直至去到年初四先見有大豆芽賣 , 其實每次當袁太買大豆芽的時候 , 必然係覺得唔開心的時候 , 因我最愛的發洩方法 , 除了打袁生 , 當袁生係出氣袋之外 , 仲喜愛剁食物來發洩 , 剁大豆芽對我來說絕對係一個唔錯的方法 , 只不過剁完後手會變得殘廢 , 係一個殘廢家常菜 ......



其實大豆芽炒肉鬆係由袁太婆婆年代一路傳下來 , 婆婆傳俾媽咪(因媽咪係大女) , 媽咪理應傳俾大女 , 即係袁太的姐姐 , 不過姐姐係一位唔喜愛入廚的人 , 所以媽咪就傳俾我 , 由我將來傳俾我的下一代(感覺好鬼有意義 ^^) 



雖然炒肉鬆只不過係一般家常菜 , 但總覺得每家每戶的做法總會有少許不同 , 而且我家袁生就至喜愛食 , 記得以往每次番娘家食飯 , 媽咪就一定會整 , 因為知道袁生喜歡 , 其實袁太食就食過好多次 , 但自己煮就真係冇幾多次 , 一想到要將大豆芽切碎後 , 再剁 ... 剁 ... 剁 ... , 未剁見到堆大豆芽都開始覺得有少許頭痛 , 呢碟大豆芽真係一個殘廢餸 , 袁太真係又切又剁到手都斷埋 , 雖然袁太的刀功一定冇婆婆及媽咪的好 , 但勝在袁生都好滿意 , 而且送飯一流 , 好似袁太平時只會食一碗飯的人 , 都可以食多一碗呢 ^^ 



材料 : 大豆芽 , 豬肉碎  , 蔥 , 蒜頭 , 酒 , 糖 , 生粉 , 胡椒粉

豬肉碎放大碗內 , 加入醃料拌勻靜待30分鐘 , 大豆芽摘去尾部 , 逐少逐少將大豆芽洗淨 , 將大豆芽切成細粒再剁碎 , 剁好的大豆芽渣乾水份 , 再繼續將餘下的大豆芽逐一洗淨 , 剁碎及渣乾水份 , 渣出來的大豆芽水分開盛起 , 蔥切段及切粒 , 蒜頭去衣拍扁備用

鑊中(不落油)放入已剁碎的大豆芽 , 用慢火慢慢烘至乾身 , 期間加入一半份量的大豆芽水 , 繼續用慢火不停在鑊中拌炒至水份收乾 , 再加入餘下份量的大豆芽水 , 再拌炒至乾身及大豆芽成金黃色(約15分鐘)盛起

燒紅鑊 , 爆香蒜頭及蔥段 , 加入豬肉碎炒至轉色 , 夾起蔥段去掉 , 加入大豆芽後贊少許酒 , 用中火拌勻炒至豬肉熟透 , 最後加少許胡椒粉調味及加入蔥粒拌勻即可

材料
大豆芽斤半 , 豬肉碎$15  , 蔥 , 蒜頭1個 , 酒 , 糖 , 生粉 , 胡椒粉

醃料
生抽 , 糖 , 麻油 , 油 , 生粉 , 水



做法
1. 豬肉碎放大碗內 , 加入醃料拌勻靜待30分鐘 

2. 大豆芽摘去尾部 , 逐少逐少將大豆芽洗淨 

3. 將大豆芽切成細粒再剁碎 , 剁好的大豆芽渣乾水份 

4. 再繼續將餘下的大豆芽逐一洗淨 , 剁碎及渣乾水份 , 渣出來的大豆芽水分開盛起  

5. 蔥切段及切粒 , 蒜頭去衣拍扁備用

6. 鑊中(不落油)放入已剁碎的大豆芽 , 用慢火慢慢烘至乾身 

7. 期間加入一半份量的大豆芽水 , 繼續用慢火不停在鑊中拌炒至水份收乾

8. 再加入餘下份量的大豆芽水 , 再拌炒至乾身及大豆芽成金黃色(約15分鐘)盛起

9. 燒紅鑊 , 爆香蒜頭及蔥段 , 加入豬肉碎炒至轉色 

10. 夾起蔥段去掉 

11. 加入大豆芽後贊少許酒 , 用中火拌勻炒至豬肉熟透 

12. 最後加少許胡椒粉調味及加入蔥粒拌勻即可

 



雖然製作過程剁大豆芽係比較辛苦 , 但勝在好拌飯的一道家常菜呢 ^^