啫啫豬潤雞煲

今日天氣相當寒冷 , 我住個區下著微微細雨 , 全身凍冰冰真唔想出街 , 天氣凍我又要食煲仔菜 , 等身體可以暖下 , 而且簡單煮一個煲仔菜同白飯 , 又可以當一餐 ......



不過煲仔菜都有好多選擇 , 今日我就整左啫啫雞 , 其實因為訓醒突然好想食豬潤 , 起初想用來煲豬潤粥 , 後來又想整豬潤麵 , 到最後決定了整啫啫雞 ~哈~ 袁太係咪好善變呢 , 整啫啫雞對我來說最重要唔係雞 , 亦唔係突然想食的豬潤 , 而係配料 , 即係洋蔥 , 乾蔥頭 , 蒜頭同蔥段個類呢 , 用來送飯真係好好味架



不過袁生成日都話我 , 見我成日只食配料 , 俾人睇到以為佢冇俾飽飯我食 , 一早炆好放入煲 , 食時再番熱就得 , 天氣持續凍冰冰 , 用煲上熱辣辣好味道呢 ^^



材料 : 雞扒 , 豬潤 , 洋蔥 , 乾蔥頭 , 蒜頭 , 薑絲 , 薑汁 , 蔥 , 雞蛋 , 胡椒粉 , 鹽 , 糖 , 酒 , 芹菜(裝飾可省略)

雞扒解凍切大件放入大碗內 , 雞蛋打出蛋白 , 雞扒肉放入大碗內加入蛋白 , 醃料及薑汁拌勻靜待1小時 , 豬潤用水沖走血水後切片 , 加入醃料及薑絲拌勻靜待1小時 , 洋蔥去皮切塊 , 蔥切段 , 蒜頭 , 乾蔥頭去衣拍扁

燒紅鑊 , 放入雞扒肉爆香至八成熟後先盛起 , 原鑊爆香乾蔥頭 , 蒜頭 , 蔥白及洋蔥炒數分鐘至洋蔥微軟 , 將雞扒肉回鑊贊少許酒 , 加入調味料拌勻快炒數分鐘 , 將蔥白盛起去掉

將全部材料轉放入細煲內 , 加入豬潤拌勻 , 蓋上蓋用慢火煮5分鐘至汁料半收乾 , 最後加入青蔥段拌勻即可

材料
雞扒1塊 , 豬潤$5 , 洋蔥1個 , 乾蔥頭5粒 , 蒜頭1個 , 薑絲 , 薑汁 , 蔥 , 雞蛋1隻 , 胡椒粉 , 鹽 , 糖 , 酒 , 芹菜(裝飾可省略)

醃料 (雞)
生抽 , 老抽 , 鹽 , 糖 ,粟粉 , 麻油 , 酒

醃料 (豬潤)
生抽 , 麻油 , 酒 , 胡椒粉

調味料
生抽 , 蠔油 , 糖 , 水



做法
1. 雞扒解凍切大件放入大碗內 , 雞蛋打出蛋白 

2. 雞扒肉放入大碗內加入蛋白 , 醃料及薑汁拌勻靜待1小時

3. 豬潤用水沖走血水後切片 , 加入醃料及薑絲拌勻靜待1小時 

4. 洋蔥去皮切塊 , 蔥切段 , 蒜頭 , 乾蔥頭去衣拍扁

5. 燒紅鑊 , 放入雞扒肉爆香至八成熟後先盛起 

6. 原鑊爆香乾蔥頭 , 蒜頭 , 蔥白及洋蔥炒數分鐘至洋蔥微軟 

7. 將雞扒肉回鑊贊少許酒 , 加入調味料拌勻快炒數分鐘 , 將蔥白盛起去掉

8. 將全部材料轉放入細煲內 , 加入豬潤拌勻 , 蓋上蓋用慢火煮5分鐘至汁料半收乾 

9. 最後加入青蔥段拌勻即可 




熱辣辣原煲上 , 雖然雞扒肉嫩滑 , 豬潤又爽脆 , 不過我還是喜愛配料多一點呢 ^^