椰汁涼粉西米露

呢兩星期的天氣簡直熱到暈 , 落一落街都出晒汗 , 好難頂 , 每逢炎熱到死的夏天 , 街市的豆腐店必然會陸續有涼粉賣 , 以往我都好方便地買幾舊回家 , 切粒再加入冰糖水浸 , 放入雪櫃雪到凍一凍 , 食時絕對透心涼 , 好鬼正



不過有時見豆腐店的涼粉就咁放係度 , 只用一張爛鬼膠蓋住 , 其實都唔太衛生 , 都唔知有幾多小強呀~~或者其他昆蟲類爬過 , 最健康 , 最衛生 , 最好的當然自家製 , 自家製涼粉材料好簡單 , 但步驟就何其多 , 先煮好涼粉水 , 又要待涼 , 又要將涼粉草搓出膠質 , 搓出膠質後又要放入魚袋再檸乾 , 涼粉水要加入生粉拌勻再煮成杰身 , 隨即倒入器皿內待涼 , 再放入雪櫃冷藏數小時 , 冷藏數小時後再調回雪櫃下層靜待一晚



大家只係睇文章會唔會覺得已經好麻煩 , 係咪會覺得點解袁太咁蠢唔買現成 , 而要咁辛苦自己整呢(袁生都係咁話我架^^) , 細細個每逢食涼粉都係用冰糖水 , 花奶一定唔會落 , 不過袁生今次想配西米露 , 仲要椰汁味個款 , 所以整完涼粉後 , 又要煮埋個椰汁西米露 , 又要放入雪櫃雪凍 , 呢個椰汁涼粉西米露 , 真係要一日做完 , 第二日先可以食 , 因為袁生話唔夠凍唔好味喎



起初都驚唔成功 , 不過幸運地涼粉雪凍後好成功 , 都算靚靚仔仔 , 將幾舊涼粉切粒後原來份量都幾多 , 可以分兩日食 , 夏天熱辣辣冇咩胃口 , 食碗透心涼的涼粉西米露 , 好有消暑的感覺呢 ^^



材料 : 涼粉草(藥材店買) , 生粉 , 冰糖 , 鹼水(雜貨店買) , 水 , 椰漿 , 花奶 , 西米 , 魚袋

涼粉草用水沖一沖洗乾淨及瀝乾水份 , 放入煲內加入鹼水及2400ml水拌勻 , 用中火煮至滾後 , 放一隻碗蓋住涼粉草 , 確保涼粉草浸於水中 , 蓋上蓋轉慢火煮30分鐘

30分鐘後將涼粉草及涼粉水盛起 , 待涼20分鐘 , 用手拎起涼粉草搓出膠質(約10分鐘) , 雙手感覺膠膠滑滑 , 好似潤膚露咁 , 涼粉草及涼粉水分開盛起 , 先盛起250ml涼粉水備用 , 魚袋放入煲內 , 將搓過的涼粉草放入 , 再倒入涼粉水隔渣 , 將魚袋盡量檸乾搓出涼粉水 , 再棄掉涼粉草

將250ml的涼粉水放入大碗內 , 加入生粉拌勻至稀粉漿 , 粉漿放回涼粉水中 , 拌勻用慢火慢慢煮至杰身 , 趁熱倒入涼粉糊於器皿內 , 先待涼30分鐘後蓋上保鮮紙 , 放入冰箱1 1/2小時至硬身 , 再放回雪櫃下層靜待一晚

 

西米放入煲內 , 加入水蓋過面 , 拌一拌勻以免西米黏底 , 用慢火慢慢拌勻煮至半透明 , 盛起西米用水沖一沖洗 , 加入冰水浸過面靜待10分鐘再瀝乾水份

 

將冰糖放入煲內 , 加2杯水份量拌勻 , 用中火煮至冰糖溶掉 , 逐一加入花奶 , 椰漿及西米拌勻用慢火煮幾分鐘至滾起 , 盛起西米露放另一煲內待涼10分鐘 , 蓋上蓋放入雪櫃靜待一晚 , 翌日將涼粉倒扣切粒放入大碗內 , 加入冰水浸10分鐘 , 再倒去水份後放入碗內 , 淋上椰汁西米露即可

材料
涼粉草2襾(藥材店買) , 生粉40g , 冰糖 , 鹼水1茶匙(雜貨店買) , 水 , 椰漿1/2杯 , 花奶1罐 , 西米 , 魚袋



做法
1. 涼粉草用水沖一沖洗乾淨及瀝乾水份 , 放入煲內加入鹼水及2400ml水拌勻 

2. 用中火煮至滾後 , 放一隻碗蓋住涼粉草 , 確保涼粉草浸於水中 

3. 蓋上蓋轉慢火煮30分鐘

4. 30分鐘後將涼粉草及涼粉水盛起 , 待涼20分鐘 

5. 用手拎起涼粉草搓出膠質(約10分鐘) , 雙手感覺膠膠滑滑 , 好似潤膚露咁 

6. 涼粉草及涼粉水分開盛起 

7. 先盛起250ml涼粉水備用 

8. 魚袋放入煲內 , 將搓過的涼粉草放入 , 再倒入涼粉水隔渣 

9. 將魚袋盡量檸乾搓出涼粉水 , 再棄掉涼粉草

10. 將250ml的涼粉水放入大碗內 , 加入生粉拌勻至稀粉漿 

11. 粉漿放回涼粉水中 , 拌勻用慢火慢慢煮至杰身 

12. 趁熱倒入涼粉糊於器皿內 , 先待涼30分鐘後蓋上保鮮紙 , 放入冰箱1 1/2小時至硬身 

13. 再放回雪櫃下層靜待一晚

14. 西米放入煲內 , 加入水蓋過面 , 拌一拌勻以免西米黏底 

15. 用慢火慢慢拌勻煮至半透明 

16. 盛起西米用水沖一沖洗 , 加入冰水浸過面靜待10分鐘再瀝乾水份  

17. 將冰糖放入煲內 , 加2杯水份量拌勻 , 用中火煮至冰糖溶掉 

18. 逐一加入花奶 , 椰漿及西米拌勻用慢火煮幾分鐘至滾起 

19. 盛起西米露放另一煲內待涼10分鐘 , 蓋上蓋放入雪櫃靜待一晚 

20. 翌日將涼粉倒扣切粒放入大碗內 , 加入冰水浸10分鐘 

21. 再倒去水份後放入碗內 , 淋上椰汁西米露即可 




自家製涼粉雖然味道同街的差不多 , 而且步驟又繁複 , 但勝在衛生得多呢 ^^