霸王花無花果貢梨豬尾骨湯

每逢夏天 , 袁太就會煲好多 ... 好多湯水 , 皆因家中的袁大爺經常話冇咩胃口 , 落雨冇胃口 , 好好太陽又話熱得滯冇胃口 , 其實我知佢只不過係差不多要交圖俾客先冇心情食野 , 所以最近都簡單煲一些比較多湯渣又清熱的湯水 , 飲湯連湯渣一齊食 , 都相當飽肚 ......



大大話話袁太喜愛入廚時間都有十幾年 , 不過呢款湯水從來未煲過 , 應該話從來冇用過霸王花煲湯 , 霸王花有清熱功效 , 絕對適合夏天飲的一款湯水



霸王花可於街市雜貨店購買 

呢款湯水除左有霸王花外 , 再加入貢梨 , 紅蘿蔔 , 豬尾骨 , 無花果同煲 , 絕對清熱又滋潤 , 而且加入豬尾骨 , 味道又變得濃濃 , 好好味呢 ^^

材料 : 霸王花 , 紅蘿蔔 , 貢梨 , 豬尾骨 , 無花果(先預先加水浸10分鐘) , 蜜棗 , 南北杏 , 鹽

豬尾骨放入煲內加水用中火煮滾出一出水 , 將出水後豬尾骨用水沖一沖洗油份 , 碎骨 , 瀝乾水份 , 霸王花用水沖洗乾淨 , 紅蘿蔔去皮切件 , 無花果切半 , 貢梨去皮去芯切件

豬尾骨放入煲內 , 逐一加入紅蘿蔔 , 霸王花 , 無花果 , 蜜棗及南北杏 , 加入適量水拌勻 , 用中火煲滾後加入貢梨肉拌勻 , 用中火煲15分鐘後蓋上蓋轉慢火煲1 1/2小時

最後加入鹽拌勻 , 轉用中火再煲滾 , 熄火焗30分鐘即可

材料
霸王花 , 紅蘿蔔2條 , 貢梨2個 , 豬尾骨 , 無花果6粒(先預先加水浸10分鐘) , 蜜棗3粒 , 南北杏 , 鹽



做法

1. 豬尾骨放入煲內加水用中火煮滾出一出水 

2. 將出水後豬尾骨用水沖一沖洗油份 , 碎骨 , 瀝乾水份

3. 霸王花用水沖洗乾淨 , 紅蘿蔔去皮切件 , 無花果切半 

4. 貢梨去皮去芯切件

5. 豬尾骨放入煲內 , 逐一加入紅蘿蔔 , 霸王花 , 無花果 , 蜜棗及南北杏 

6. 加入適量水拌勻 

7. 用中火煲滾後加入貢梨肉拌勻 , 用中火煲15分鐘後蓋上蓋轉慢火煲1 1/2小時

8. 最後加入鹽拌勻 , 轉用中火再煲滾 , 熄火焗30分鐘即可 




晚餐雖然只有一碗湯 , 但勝在多湯渣 , 已經好足夠呢 ^^