青欖桔餅海底椰片燉排骨湯

最近為了打點老爺的身後事 , 每朝都有事情要一早出外處理 , 回家已完全冇動力入廚房煮食 , 唔好話煮食 , 甚至完全冇胃口食野 , 夜晚都求求其其食杯麵或麵包算了 , 因老爺生前非常疼愛袁生袁太 , 所以完全進入傷心狀態 , 成個人好似冇晒方向咁 ......



慶幸老爺走時不痛苦 , 走得安詳係我們最安慰的 , 亦慶幸各方面手續 , 教會幫忙安排的所有事宜都非常順利 , 暫時可以抖抖休息一下



呢排天氣實在忽冷忽熱 , 有時天氣熱到爆 , 有時又天蔭蔭吹寒風 , 甚至落雨行雷添 , 最近為忙打點老爺的事 , 根本冇時間 , 亦冇咩心情煮飯 , 不過見每日出外處理事情 , 再加上炎熱的天氣 , 袁生身體亦開始有少許唔妥 , 開始有少許咳 , 所以袁太就算幾疲倦 , 都去街市買青欖桔餅 , 呢個止咳黃金組合去煲湯 , 另配上海底椰片 , 排骨頭 , 無花果同煲 , 呀~~~ , 唔係煲 , 應該係燉 , 燉湯當然又係用美的蒸燉寶呢個好幫手 , 燉佢兩粒鐘 , 就有碗熱辣辣的燉排骨湯俾袁生飲 , 袁生對呢個湯水相當滿意 , 味道濃濃之餘 , 而且大讚呢款湯水飲完喉嚨好舒服 , 不過唔知止唔止到咳呢 ^^



材料 : 青欖 , 桔餅 , 排骨頭 , 海底椰片 , 果皮(預先加水浸軟) , 南北杏 , 無花果(預先加水浸10分鐘) , 鹽 , 美的陶瓷蒸燉寶(MD8101F)

排骨頭放入煲內 , 加水用中火煮數分鐘至大滾出水 , 將排骨頭沖一沖洗去碎骨及瀝乾水份 , 青欖 , 桔餅洗淨 , 青欖怕碎 , 桔餅剪半 , 無花果切半 , 海底椰片用水沖一沖洗及瀝乾 , 果皮刮去囊撕成細塊放入煲內 , 加入水用中火煮滾至熱果皮水 

逐一將排骨頭 , 海底椰片 , 青欖 , 桔餅 , 無花果放入美的陶瓷蒸燉寶的燉盅內 , 再加入熱果皮水至滿 , 蓋上燉盅蓋 , 蒸燉寶的煲內加熱水至水位位置 , 放上蒸架 , 放上燉盅 , 蓋上煲蓋 , 先按<功能>鍵 , 調至精華燉功能 , 時間調至2Hours , 再按<開始 / 取消>鍵 , 由佢燉 , 小心蒸氣口 

燉至剩餘一小時後會有時間顯示 , 直至嗶嗶聲響代表燉完 , 會進入保溫模式 , 最後加少許鹽調味拌勻 , 蓋上蓋焗30分鐘即可

材料
青欖$10 , 桔餅2個 , 排骨頭$30 , 海底椰片 , 果皮2塊(預先加水浸軟) , 南北杏 , 無花果4粒(預先加水浸10分鐘) , 鹽 , 美的陶瓷蒸燉寶(MD8101F)



做法
1. 排骨頭放入煲內 , 加水用中火煮數分鐘至大滾出水 

2. 將排骨頭沖一沖洗去碎骨及瀝乾水份

3. 青欖 , 桔餅洗淨 , 青欖怕碎 , 桔餅剪半 , 無花果切半 

4. 海底椰片用水沖一沖洗及瀝乾 

5. 果皮刮去囊撕成細塊放入煲內 , 加入水用中火煮滾至熱果皮水 

6. 逐一將排骨頭 , 海底椰片 , 青欖 , 桔餅 , 無花果放入美的陶瓷蒸燉寶的燉盅內 

7. 再加入熱果皮水至滿 

8. 蓋上燉盅蓋 , 蒸燉寶的煲內加熱水至水位位置 , 放上蒸架 , 放上燉盅 

9. 蓋上煲蓋 , 先按<功能>鍵 , 調至精華燉功能 , 時間調至2Hours 

10. 再按<開始 / 取消>鍵 , 由佢燉 , 小心蒸氣口 

11. 燉至剩餘一小時後會有時間顯示 

12. 直至嗶嗶聲響代表燉完 , 會進入保溫模式 

13. 最後加少許鹽調味拌勻 , 蓋上蓋焗30分鐘即可 




味道濃濃的燉排骨湯 , 配上青欖桔餅的黃金組合 , 還有海底椰片及無花果的滋潤材料 , 飲完此湯喉嚨好舒服 , 大家有機會都用青欖桔餅煲湯呢 ^^