蒜蓉豆豉蒸雞翼

蒜蓉豆豉一向都係袁生袁太的至愛 , 無論用來蒸魚 , 蒸肉或豆腐都來者不拒 , 多多碗飯都食得落 , 但心中有疑問 : ~蒜蓉豆豉~ 係蔬菜方面是否一定要配涼瓜 ??? 海鮮方面是否一定要配帶子???扇貝???倉魚???肉類方面是否一定要配排骨 ......



其實大家有冇發覺袁太平時係好少煮排骨呢 , 平時煮豬肉類多數都係煮豬扒或者腩肉多 , 其實偷偷同大家講 , 我唔係好識買排骨架 , 曾經係超市買過(唔好吃) , 亦曾經係急凍店買排骨粒(又是唔好吃) , 大家一定會同袁太講 , 買排骨當然去豬肉店 , ~哈~ I Know呀~~~ , 不過每次同豬肉哥哥話買排骨 , 用來蒸的 , 回家蒸好後發覺肉質硬過我條命 , 而且仲乾過我荷包 , 自此唔敢再買



見冰箱又有雞翼存貨 , 就試下用來配蒜蓉豆豉蒸 , 估唔到配雞翼非常惹味及美味 , 袁生話雞肉好嫩滑 , 而且豆豉醬好香 , 用汁料撈飯都相當一流 , 今次煮雞翼袁太就冇份喇 , 不過我都唔執輸用左蒜蓉豆豉醬撈飯食呢 ^^ 

材料 : 雞中翼 , 豆豉 , 蒜蓉 , 薑 , 蔥 , 酒 , 鹽 , 糖 , 雞粉 , 胡椒粉 , 辣椒 , 油 , 美的早餐機(MZ-DSY18A)

雞中翼用叉拮幾下方便醃的時候比較入味 , 雞中翼用水沖一沖洗 , 再抹乾水份 , 放入大碗內加少許雞粉 , 胡椒粉及醃料拌勻靜待1小時 , 期間將薑去皮切細粒 , 蔥切粒及幼絲 , 豆豉剁碎 , 辣椒切粒

燒紅鑊 , 先放入豆豉 , 薑粒 , 辣椒粒及一半份量蒜蓉用中火爆香數分鐘至有香味 , 再加入蔥粒拌勻炒香先盛起備用 , 餘下一半份量蒜蓉及調味料放入煲內煮熱備用

醃好的雞翼放上碟 , 放入早餐機的蒸架上 , 蓋上蓋按<蒸 / 煮>功能 , 時間調至15分鐘 , 15分鐘後焗5分鐘 , 取出將雞翼倒去水份 , 雞翼連蒜蓉豆豉醬轉放另一碟內 , 淋上調味料 , 最後放上蔥絲即可

材料 
雞中翼8隻 , 豆豉 , 蒜蓉 , 薑 , 蔥 , 酒 , 鹽 , 糖 , 雞粉 , 胡椒粉 , 辣椒2隻 , 油 , 美的早餐機(MZ-DSY18A)

醃料 
生抽 , 老抽 , 鹽 , 糖 , 酒 , 麻油

調味料
生抽 , 老抽 , 糖 , 油



做法
1. 雞中翼用叉拮幾下方便醃的時候比較入味 

2. 雞中翼用水沖一沖洗 , 再抹乾水份 

3. 放入大碗內加少許雞粉 , 胡椒粉及醃料拌勻靜待1小時 

4. 期間將薑去皮切細粒 , 蔥切粒及幼絲 , 豆豉剁碎 , 辣椒切粒

5. 燒紅鑊 , 先放入豆豉 , 薑粒 , 辣椒粒及一半份量蒜蓉用中火爆香數分鐘至有香味

6. 再加入蔥粒拌勻炒香先盛起備用 

7. 餘下一半份量蒜蓉及調味料放入煲內煮熱備用

8. 醃好的雞翼放上碟 , 放入早餐機的蒸架上 , 蓋上蓋按<蒸 / 煮>功能 , 時間調至15分鐘 

9. 15分鐘後焗5分鐘 

10. 取出將雞翼倒去水份 , 雞翼連蒜蓉豆豉醬轉放另一碟內 

11. 淋上調味料 , 最後放上蔥絲即可 




雞肉嫩滑配上濃郁的汁料 , 配上一碗白飯已經好足夠 , 剩下的蒜蓉豆豉醬 , 下次簡單用來蒸豆腐都應該唔錯呢 ^^