滷水豬腩肉

前排係急凍店見豬腩肉剛剛開箱 , 條條都半肥瘦好鬼靚仔 , 一開箱已經見到一大群太太們 , 迫入豬腩肉堆中瘋狂選購 , 不過袁太的功力一定唔及其他太太們 , 所以唯有慢慢等呢班太太們買完 , 袁太才慢慢選購 ......



最終買了兩條靚靚豬腩肉回家 , 豬腩肉平時袁太最愛用炆的方法製作 , 例如用白蘿蔔炆 , 用梅菜炆 , 用清湯炆 , 全部都好好味道 , 不過有一樣袁生袁太最愛食既 , 呢樣就係滷水喇 , 袁生袁太真係好喜歡食滷水架 , 無論滷水雞翼 , 雞蛋 , 雞腎 , 牛展 , 鴨舌 , 豬手 , 大腸或紅腸我們統統都愛 , 所以今次就用滷水製作



做法好簡單 , 將豬腩肉加蔥出水再浸冰水 , 放入煲加入係雜貨店買的滷水料 , 冰糖 , 薑 , 調味料及水拌勻 , 滷佢1小時再焗 , 焗越長時間就越入味 , 如果大家冇時間 , 最少都要焗一粒鐘呀 , 食前先將豬腩肉切件上碟 , 咁就係一碟超邪惡的滷水豬腩肉做晚餐呢 ^^



材料 : 豬腩肉 , 滷水料 , 冰糖 , 薑 , 酒 , 蔥 , 鹽 , 美的早餐機(MZ-DSY18A)

豬腩肉放入煲內 , 加蔥段及 , 用中火煮滾出水 , 用水沖一沖洗後加入冰水浸10分鐘

豬腩肉放入早餐機的煲仔內 , 逐一加入滷水料 , 少許鹽 , 冰糖 , 薑絲及調味料 , 再加入水浸過腩肉面拌勻 , 蓋上蓋按<蒸 / 煮>功能 , 先將時間調至15分鐘 , 15分鐘後將火力調低至300 , 煮約數分鐘後開少少蓋 , 時間調至1小時繼續煮 , 煮1小時後再焗1小時至入味即可

材料
豬腩肉2條 , 滷水料 , 冰糖 , 薑 , 酒 , 蔥 , 鹽 , 美的早餐機(MZ-DSY18A)

調味料
生抽5湯匙 , 老抽3湯匙 , 酒2湯匙



做法
1. 豬腩肉放入煲內 , 加蔥段及 , 用中火煮滾出水 , 用水沖一沖洗後加入冰水浸10分鐘

2. 豬腩肉放入早餐機的煲仔內 

3. 逐一加入滷水料 , 少許鹽 , 冰糖 , 薑絲及調味料 , 再加入水浸過腩肉面拌勻

4. 蓋上蓋按<蒸 / 煮>功能 , 先將時間調至15分鐘 

5. 15分鐘後將火力調低至300 , 煮約數分鐘後開少少蓋 , 時間調至1小時繼續煮 

6. 煮1小時後再焗1小時至入味即可 




呢碟滷水豬腩肉雖然邪惡 , 但真係好鬼美味呢 ^^