2019年6月25日 星期二

大白菜木耳豬肉蒸餃




最近天氣相當炎熱 , 一時有猛猛太陽 , 一時落雨又變得焗,不過有時又覺得沾寒沾凍 , 都唔知係咪想作病 , 最近又受到腰患的關係 , 唔想長時間企係廚房煮食 , 但又唔想食外賣 , 最好選擇當然又係包餃餃 ......



日常生活我同袁生都喜愛食餃 , 以前只會係超市買一包包的現成餃子回家煮 , 不過越食就越覺得唔好味 , 所以近呢幾年都會選擇自己動手包 , 永遠覺得自己包 , 可以用咩材料都得 , 既健康又新鮮 , 同埋可以控制鹹味的程度 , 今次就選擇用大白菜配豬肉做餡料 , 另外加上爽口的木耳絲 , 起初包完餃餃 , 想用作煎餃及湯餃兩款 , 不過湯餃所用的湯底袁太又冇準備到 , 其實袁太想問問大家 , 大家有咩湯餃的湯底可以介紹俾袁太呢 ???





不過當然湯底裡面唔可以用雞湯 , 雞粉或牛肉湯之類呢 , 如果大家有湯底好介紹 , 不妨話俾袁太知 ^^



既然冇預備湯餃底 , 咁就簡單整蒸餃 , 袁生每次食蒸餃就一定要配豆瓣醬或辣椒豉油拌食 , 不過今次就調左個青檸醬油汁代替 , 袁生好喜歡 , 而袁太就喜歡咩都唔沾 , 只係蒸完餃後灑少許黑白芝麻 , 簡單又好味呢 ^^




材料 : 半肥瘦梅頭肉 , 大白菜 , 木耳絲 , 薑 , 餃子皮 , 麵粉 , 胡椒粉 , 鹽 , 糖 , 蒜頭 , 蔥 , 青檸 , 美的早餐機(MZ-DSY18A)




半肥瘦梅頭肉切絲再切粒後剁成肉餅狀 , 木耳絲浸水待軟身 , 薑蘑成薑汁 , 青檸切半 , 蒜頭去衣切粒 , 蔥切粒 , 將豬肉碎放入大碗內先加入薑汁 , 再加入醃料拌勻靜待30分鐘













大白菜去蒂 , 加少許鹽及水浸過面靜待10分鐘 , 10分鐘後將大白菜用水沖洗乾淨 , 放入煲內加少許鹽用中火煮至菜軟身 , 盛起切碎再渣乾水份 , 浸至軟身的木耳絲用水沖一沖洗及瀝乾 , 之前醃左30分鐘的豬肉碎 , 逐一加入大白菜碎及木耳絲拌勻 , 用手撻十餘下 , 蓋上保鮮紙入雪櫃靜待1小時


























器皿內灑上麵粉 , 將餡料放上餃子皮中間位置 , 再對摺封口 , 餃子面再灑上麵粉靜待10分鐘 , 取適量餃子放入美的早餐機的蒸架上蓋上蓋按<蒸 / 煮>功能 , 時間調至15分鐘再焗5分鐘至餃子熟透 , 最後將蒜粒 , 蔥粒放入碟內 , 加入青檸汁及調味料拌勻成汁料即可






















材料 
半肥瘦梅頭肉$20 , 大白菜1斤 , 木耳絲 , 薑 , 餃子皮 , 麵粉 , 胡椒粉 , 鹽 , 糖 , 蒜頭1/2個 , 蔥 , 青檸1個 , 美的早餐機(MZ-DSY18A)

醃料 
生抽 , 老抽 , 糖 , 生粉 , 油 , 麻油 , 胡椒粉

調味料 
生抽 , 糖 , 暖水



做法
1. 半肥瘦梅頭肉切絲再切粒後剁成肉餅狀 

2. 木耳絲浸水待軟身 , 薑蘑成薑汁 , 青檸切半 , 蒜頭去衣切粒 , 蔥切粒

3. 將豬肉碎放入大碗內先加入薑汁 , 再加入醃料拌勻靜待30分鐘 

4. 大白菜去蒂 , 加少許鹽及水浸過面靜待10分鐘

5. 10分鐘後將大白菜用水沖洗乾淨 , 放入煲內加少許鹽用中火煮至菜軟身

6. 盛起切碎再渣乾水份

7. 浸至軟身的木耳絲用水沖一沖洗及瀝乾 

8. 之前醃左30分鐘的豬肉碎 , 逐一加入大白菜碎及木耳絲拌勻 

9. 用手撻十餘下 , 蓋上保鮮紙入雪櫃靜待1小時 

10. 器皿內灑上麵粉 , 將餡料放上餃子皮中間位置 , 再對摺封口 

11. 餃子面再灑上麵粉靜待10分鐘 

12. 取適量餃子放入美的早餐機的蒸架上蓋上蓋按<蒸 / 煮>功能 

13. 時間調至15分鐘再焗5分鐘至餃子熟透 

14. 最後將蒜粒 , 蔥粒放入碟內 , 加入青檸汁及調味料拌勻成汁料即可




自家製餃子永遠夠足料 , 今次因為清冰箱的豬肉 , 所以只包了21隻 , 感覺唔係好夠食,如果喜歡煎餃的朋友仔,將餃子放入鑊煎至金黃都同樣美味呢 ^^










5 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......