紅酒炆牛肋條

上次整左紅酒燴牛尾,
味道都幾好,不過今次就轉整紅酒炆牛肋條!
其實同上次紅酒炆牛尾的做法係一樣,
而今次吸取左上次的經驗,
今次落多少少酒,落少d茄膏,
味道真係好過上次喎!
不過用紅酒炆餸都係偶然食一兩次好喇!
因為我覺得會好燥!







~紅酒炆牛肋條~食譜

材料 :牛肋條-1包 / 紅蘿蔔-半條 / 茄膏-半罐 / 洋蔥-1個 / 紅酒-1 1/2杯 / 蒜頭 , 乾蔥頭 - 少許

 
1.牛肋條先拖一拖水,再煎至半熟後撈起,備用.
2.燒紅鑊,將乾蔥和洋蔥炒香,再下蒜頭爆香.
3.將茄膏,紅蘿蔔,加入鑊中炒香,下紅酒,牛肋條,水拌勻,加少許鹽調味.
4.以中小火炆1-1 1/2小時至淋身,即可.
   (要間中開蓋兜一兜,及加水繼續炆煮,以免乾水,而紅酒份量可隨個人喜好).

 

紅酒燴牛尾

今次第一次整紅酒燴牛尾,
雖然個製成品唔係咁討好,
但味道都ok架!
不過酒味唔夠重,
茄膏落多左少少,
仲有之前切左d煙肉落去一齊炆,
但炆完D煙肉都唔知去左邊,
唔見晒!
不過整體上都好好味!

~紅酒燴牛尾~食譜

材料 : 牛尾-1包 / 煙肉-5條 / 紅蘿蔔-半條 / 茄膏-1小罐 / 紅酒-1-2杯 / 洋蔥-半個 / 蒜頭,乾蔥頭 - 少許

 

1.把煙肉切條後,放入鑊中炒香.
   
2.牛尾先拖一拖水,再煎至半熟後撈起,備用.

3.燒紅鑊,將乾蔥和洋蔥炒香,再下蒜頭爆香.
4.將茄膏,紅蘿蔔,加入鑊中炒香.
5.下紅酒,牛尾,水拌勻,加少許鹽,糖調味.
6.以中小火炆1-1 1/2小時至淋身,即可.

   (要間中開蓋兜一兜,及加水繼續炆煮,以免乾水,而紅酒的份量可隨個人喜好而定).

 

鹹蛋蒸肉餅

呢幾日都遲收工,
番到屋企附近的街市都7點喇,
好多鋪頭都準備收工,
無咩選舉,但又唔想出街食,
咁不如就簡簡單單蒸個鹹蛋肉餅算喇!
不過老公成日話我整的肉餅始終冇餐廳個d整得好食,
唉...有老婆整俾你食咪算好囉!
仲係度嫌三嫌四!



~鹹蛋蒸肉餅~食譜

材料 : 梅頭瘦肉(半肥瘦)-$20 / 鹹蛋-1隻

                      醃料 : 生抽 , 老抽 , 糖 - 適量                     
 

 

1.豬肉剁碎後,加入醃料醃15分鐘.
 
2.再加入鹹蛋白,麻油,生粉,水後不停攪,攪到豬肉有輕身的感覺就ok.
 
3.肉餅臨蒸前係蒸碟上搽少許油,將預備好的肉餅放在碟上,加入鹹蛋黃.
4.用大火隔水蒸20分鐘即可.

中秋節快樂

就快中秋節,係度請大家食個柿喇!中秋節快樂!