椰菜絲火腿煎蛋

呢個椰菜絲火腿煎蛋好好味架,大家都可以整黎試下

袁太見好耐冇整煎蛋
所以就諗住用黎做晚餐
而首選梗係菜脯煎蛋,簡直係我的至愛
但可惜袁生唔鍾意菜脯架
又要諗下轉咩材料好
點知開雪櫃發現有半個椰菜,冰箱有火腿
如果撈埋一齊煎的話
唔知味道會係點既呢
答案就係"好好味架"
好味的程度就連袁生食第一啖的時候
主動同袁太講"好味喎"
平時袁生唔會講袁太煮的食物好味架
要袁太問好多次先肯講
所以好呀
同埋個賣相有少少似涼瓜煎蛋!

~椰菜絲火腿煎蛋~


材料:

椰菜-半個/火腿-3片/雞蛋-4隻



做法:
<1>
椰菜洗淨切絲,火腿切條.

<2>
雞蛋加入少許生抽,麻油調味打勻備用.

<3>
燒紅鑊,加入椰菜絲,少許雞粉,鹽炒至軟身後下火腿炒勻盛起.

<4>
將椰菜,火腿加入蛋液中拌勻.

<5>
燒紅鑊(油落多少少),將蛋液倒入,用慢火煎熟一面後,反轉煎另一面,兩面金黃色即可.

花雕煮雞扒

又煮左一道令袁生愛上的食物

某一日放假,袁太朝早食完早餐
諗住下午的時候先去街市買餸煮飯
點知訓著左自己唔知
訓下訓下成六點幾先識醒
大鑊未買餸添
唯有睇下雪櫃有咩材料
好彩雪櫃仲有約半斤白菜,冰箱有兩塊雞扒
咁都夠材料可以煮晚飯
但雞扒點煮先好呢
雖然雞扒唔係蒸就係炒
但屋企冇其他配料可以一齊配搭喎
~究竟點算好呀~
係廚房見到支花雕酒,係新買既,開都未開過
咁不如就用花雕酒黎煮喇
再加少少薑同蔥,味道應該唔錯
雖然材料做法都好簡單
但最係袁生食過之後話好鍾意
係嫌酒味唔夠重
下次應該要醃多少少時間先夠味!

~花雕煮雞扒~


材料:

雞扒-2塊/花雕油-適量/鹽-少許/薑,蔥-適量

調味料:
蒸雞扒汁-5湯匙/蠔油,糖,生粉,生抽-少許



做法:
<1>
雞扒洗淨,用少許鹽,花雕酒搽勻醃2小時(應該要醃約4-5小時)

<2>
薑切絲,蔥切粒備用.

<3>
將醃好的雞扒隔水蒸20分鐘後熄火焗5分鐘,蒸雞汁留用.

<4>
雞扒待涼後切件放上碟備用.

<5>
將調味料同薑絲拌勻後放入鑊中煮滾,淋在雞扒上,最後灑上蔥花即可.

蓮藕鱆魚綠豆馬蹄排骨湯

又係煲湯的時候,今次煲的湯水係袁生至愛的蓮藕湯

有時真係煲蓮藕湯都煲到厭
但冇辦法,鬼叫袁生鍾意咩
袁太煮親飯,煲咩湯都會以袁生為大前提
我真係一個好老婆(又自己讚自己,大家唔好見怪)
講番個湯先
其實煲蓮藕湯多數都係用鱆魚綠豆
袁太梗係唔例外都係用呢d材料喇
另外再加左少少馬蹄一齊煲
馬啼爽爽甜甜咁,味道唔錯架
不過袁生就似乎唔太鍾意馬蹄咁喎
又或者袁生一向都唔鍾意食湯渣
反而袁太就好鍾意湯渣
d湯渣好好味架
蓮藕又粉,馬蹄又爽,排骨又啖啖肉
真係唔駛煮飯
飲碗湯食湯渣都夠飽lu!

~蓮藕鱆魚綠豆馬蹄排骨湯~



材料:
蓮藕-2節/鱆魚-1塊/馬蹄-10粒/綠豆-適量/排骨-$20/蜜棗-2粒

做法:

<1>
蓮藕去皮切件,馬蹄去皮備用.

<2>綠豆,鱆魚浸水,排骨出水.

<3>煲內放入適量的水,放入蜜棗,待滾後加入綠豆,鱆魚,排骨用大火煲30分鐘.


<4>
再加入蓮藕,馬蹄煲30分鐘後轉慢火煲1小時,下少許鹽調味即可.

                                                              

一個人去西環探奶奶

袁太星期二的時候要去西環做野
做完唔駛番公司
就順路去探奶奶(因為奶奶係西環)
不過今次都係袁太第一次去奶奶到
因為次次都係同袁生一齊先會去
順便俾番個電話奶奶(之前幫奶奶攞左個mobile去整)
上到去奶奶問我趕唔趕時間走
我話唔趕都係番屋企姐
咁奶奶就同我傾下計
傾下傾下就傾左個半鐘
真係未試過淨係同奶奶兩個座係度傾咁耐
今次真係第一次
可能因為大家都係女人,所以咩都可能傾得一餐
同埋奶奶講左好多袁生細個的事俾我聽
又問我同袁生結左婚後
袁生脾氣又冇好左
因為袁生平時性格都幾火爆
可能平時同袁生一齊上去
奶奶唔敢問我掛
今次得兩個人,奶奶又咁問到
袁太梗係唔會放過呢個機會
就同奶奶講,袁生有時都幾難頂架
不過一齊左咁多年都慣晒lu(袁太笑笑口咁答)
奶奶同新抱就係咁傾下笑下都好夜lu
所以袁太就話"嘩...咁夜喇,我要番去煮飯俾你個仔食,下次再黎傾過喇"
奶奶仲陪我一齊去等車
等我上左車先走
其實婆媳都唔係咁難相處姐(一齊住就好難講)!

 

袁生-去濕湯

袁太特登煲俾袁生飲的去濕湯水

袁生隻腳唔知點解近呢一,兩年
個膝頭哥位置間唔中就痛一痛
初初懷疑因為食左香蕉,豆類的食物先會痛
但原來唔關事
之前照個X光,又話d骨冇事
後來又話係水瘤
亦都抽過水
但呢幾日又唔知做咩又痛番,真惡攪
所以袁太就上網搵資料
原來有好多男性都有類似的情況出現
話因為以前做運動勞損左又唔理
所以就會有咁既情況出現
袁太諗諗下又係喎
袁生以前真係成日做運動個喎
仲顛到成日就去參加馬拉松
可能就係因為咁,所以勞損左自己唔知
袁太見d網友都係話可以煲d湯水飲
話一星期飲2-3晚,就會慢慢好
個湯水就係"土伏苓瘦肉湯"
材料就有:土伏苓,入地老鼠,瘦肉,果皮,蜜棗
水滾後用慢火煲3小時就可以
不過袁太試過味道苦苦地,甘甘地
都唔係好啱我飲
橫掂都係專登煲俾袁生既
咁就叫袁生飲晒佢
不過咁大煲湯係要分兩晚飲
然後下星期又再煲過
希望真係有幫助喇!