南乳花生炆豬手

無意中經過街市見到豬手好靚,
何況最近天氣凍左咁多,
最好就整炆餸暖下個胃喇!
咁就即刻打俾老公問食唔食炆豬手,
老公就話"你炆得好唔好食架",
我話雖然未整過,但應該ok既,
咁就買左1磅豬手,一包南乳醬,幾蚊花生,
番到屋企就開始整喇!
整的過程一d都唔難,
而且仲好好味添!



~南乳花生炆豬手~食譜

材料 : 豬手-1磅 / 花生-$3 / 南乳-1磚 / 薑-3片

                      調味料 : 蠔油 , 鹽 - 少許 / 冰糖-1小粒

 

1.豬手放入滾水煮5分鐘,撈起洗淨後放入冰水30分鐘.
 
2.花生用水浸一會後,用滾水煮一煮,撈起,備用.
3.燒紅鑊,爆香薑片,加豬手炒香,贊少許紹酒.

4.再加入南乳炒香,待每隻豬手都沾有少少南乳醬後,加入花生及水(水的份量要蓋過豬手).
5.並放入調味料炆約1小時或至腍身即可.