菜乾合掌瓜紅蘿蔔瘦肉湯

今日突然好想飲菜乾湯,但又唔想用大白菜煲,
所以就選擇左用合掌瓜煲,
其實呢個湯之前都未煲過,
唔知個配搭好唔好既呢
不過以前飲菜乾湯都係番屋企飲媽咪煲的,
不過媽咪會加埋豬肺一齊煲,不過豬肺太難攪喇!
所以自己煲的話,
唔用豬肺喇!就咁用瘦肉煲算喇!
雖然味道始終唔夠用豬肺煲的好味,
但應該都會幾好飲!

~菜乾合掌瓜紅蘿蔔瘦肉湯~食譜

材料 : 菜乾-半扎 / 合掌瓜-2個 / 紅蘿蔔-1條 / 瑤柱-2粒 / 瘦肉-$10 / 果皮-1小塊 / 蜜棗-2粒 /
                               南北行-少許


 做法:                      

 1.菜乾洗淨浸水2小時後搾乾水,備用.

 2.果皮浸水後刮去瓤,瑤柱浸水3小時,備用.

 3.瘦肉洗淨出水,南北杏,蜜棗洗淨.

 4.煲內放入適量的水,蜜棗,南北行,果皮凍水落,滾後放入瘦肉,紅蘿蔔,瑤柱用大火煲30分鐘.
 5.加入合掌瓜,菜乾用大火煲30分鐘後,再轉慢火煲1 1/2小時,下少許鹽調味,即可.