蘋果汁青檸梳打 <附食譜>

前幾日整海南雞的醬汁時用剩一粒青檸，初時諗住用黎焗烏頭，點知袁生又話唔想食魚，唉...咁粒青檸點算好呢???

~呀~諗到，一於用黎整飲品，咁啱雪櫃有支雪碧，咪可以整青檸梳打囉，又見飯枱仲有兩個深色紅蘋果，如果將蘋果榨汁加埋落去青檸梳打內，唔知味道會係點既呢???

整好後，係時候俾袁生試下味，點知袁生第一句就問 "咩黎架，會唔會肚痛架"，我頂...頂...頂...你飲左先喇，睇下飲唔飲到入面有d咩材料???，估唔到袁生都幾叻，飲到入面有蘋果味，仲話味道唔錯，幾好飲 !



蘋果汁青檸梳打
材料 : 蘋果<2個>，青檸<1個>，蜜糖，冰塊，水<適量>，雪碧<適量>


做法 :
1. 蘋果洗淨切粒放入攪拌機內，再加入冰塊，蜜糖，水打成蘋果汁備用

2. 用手按壓滾動青檸，切成4份

3. 杯內放入1/3份量的蘋果汁，將2份青檸榨汁放入杯中

4. 加入已榨汁的青檸於杯內，最後倒入雪碧即可