咖哩牛肉 + 薄餅

最近呢幾日天氣稍為涼左少少，由其係夜晚，D風勁到直頭連窗都可以扯開晒 

最重要係風大到BB都嘈醒左，真係陰公豬囉 

今日去街市買餸的時候，又見到好多人去買打邊爐的材料 

其實天氣涼，除左大家圍埋打邊爐烚下烚下外 

煮D辣的食物暖下胃，都係一個唔錯的選擇，袁太喜愛辣的食物，首選梗係咖哩喇 

呢個咖哩做法係賣菜姐姐教我整架，不過佢話都幾辣架，咁啱晒喇 

誓要辣到袁生飛起先得 !

其實初初諗住整牛腩或者羊腩架，但由於時間關係所致，所以都係隱陣起見整咖哩牛肉 

當袁生係廚房整咖哩的時候，突然醒起，食咖哩點可以冇薄餅呢 ??? 

但好可惜，屋企冇現成薄餅喎，但好好彩有麵粉係度 

一於就膽粗粗自己搓麵糰整薄餅，有咖哩汁送薄餅，咁就可以連飯都唔駛煮 

當煮好咖哩就試下味道，嘩 ... 又真係幾辣咁喎，但辣得黎又好好味 

反而袁生就覺得味道啱啱好 !

不過最估唔到D薄餅好成功，成功到連袁生都問"D薄餅買架，幾好味喎" 

你就想，我自己整架，袁生對今次的咖哩牛肉 + 薄餅的評語非常之高 

由其薄餅沾咖哩汁一齊食，真係好味到唔知點形容 

不過美中不足就係今次整得太少牛肉，梗係喇，因為平時整親牛肉，袁生都話硬 

所以今次咪唔敢買咁多囉

袁太係度要多謝賣菜姐姐俾左叱個咁好的食譜我，如果唔係我都唔會煮到一碟咁好的咖哩 ^3^

咖哩牛肉 + 薄餅

材料(咖哩牛肉)：牛肉<$15>，薯仔<1個>，咖哩磚<1包>，洋蔥<半個>，紅椒<1個>，青椒<1個>，辣椒油<少許>

材料(薄餅)：麵粉<250g>，菜油<10g>，牛油(溶解)<適量>，鹽<適量>，水<125ml>

醃料 : 生抽<1茶匙>，生粉<少許>，糖<少許>，酒<少許>，胡椒粉<少許>

做法(咖哩牛肉)：

1. 牛肉切片後加入醃料醃30分鐘，薯仔去皮切粒

2. 洋蔥去皮切條，紅椒，青椒分別切粒備用

3. 燒紅鑊，爆香牛肉至稍為轉色，盛起

4. 再爆香紅椒，青椒，洋蔥至軟身，加入咖哩磚及水，用大火煮20分鐘

5. 加入牛肉，薯仔粒，用慢火煮30分鐘，熄火後加入少許辣椒油拌勻即可

做法(薄餅)：

1. 鹽加入已篩好的麵粉拌勻，再加入水搓成粉糰

2. 將已搓好的粉糰用叉吉入粉糰數次，做成粉糰有小孔狀態

3. 將菜油分兩次加入再搓成粉糰(此時粉糰會變得光滑)

4. 粉糰蓋上濕布，釀其發酵1小時

5. 當發酵完成，把適量的麵粉灑上粉糰上至粉糰乾身

6. 將粉糰搓成條狀，用刮刀切成數份，用麵棒桿平至薄薄一片

7. 將一塊薄片掃上牛油，再把另一塊薄片蓋上，再用麵棒桿平至薄薄一片

8. 燒紅鑊(不需要落油)，將薄片放入鑊中，用慢火煎至兩面稍為金黃即可