烚下烚下 <附枝竹馬蹄羊腩煲食譜>

前幾日天氣比較凍，所以枝竹羊腩煲係時候出場，不過唔知係咪天氣凍的時候，好多人都會選擇羊腩煲呢 ???

因為袁太下午時份諗住早D去街市買新鮮羊腩，點知已經全部沽清，所以為由去買急凍羊腩喇，應該唔會太大分別，如果整羊腩煲，當然要加枝竹同馬蹄，仲有袁生至愛的腐乳醬

雖然今次買的羊腩比較瘦，但都唔會好硬，只係袁生話鹹左少少，唔通柱候醬落得太多 ???

不過最緊要好味就得喇，開飯的時候，烚下烚下咁食，真係好有風味，真係成個人都暖晒
，不過袁生好似唔係好夠食，下次再凍D的時候，一定要再整過，仲要整多D先得 !



枝竹馬蹄羊腩煲 
材料 : 羊腩<約2磅>，炸枝竹<1包>，馬蹄<12粒>，生菜<1棵>，蔥段(切段)，冰糖<適量>，薑<3片>
調味料 : 南乳<1磚>，柱候醬<3湯匙>，腐乳<1湯匙>，生抽，老抽<適量>


做法 :
1. 炸枝竹用水浸軟，生菜洗淨，馬蹄去皮洗淨備用

2. 燒滾水，加入薑片，蔥段及紹酒，放入羊腩出水約10分鐘後盛起

3. 燒紅鑊，爆香薑片，加入羊腩兜勻，加入調味料，冰糖及水(水的份量蓋過羊腩)，用火煮滾後加入馬蹄，再轉慢火炆1小時，再放入炸枝竹炆10分鐘，熄火焗30分鐘

4. 食前放入鍋內翻滾，加埋生菜烚下烚下即可

羊腩煲唔一定要出街食，自己整都好好味 !