自家製(2013.4.23梅酒) <附做法>

最近袁太留意好多Blog友都開始浸梅酒，攪到我心思思又想自家製梅酒，不過好可惜附近街市居然冇青梅賣，唔係咁大鑊呀 ???

唯有行去第二個街市碰碰運氣，好好彩地俾我見到有一間有得賣，不過都唔係淨番好多，咁就買兩磅玩下 

其實唔試下自己整都唔知原來梅酒咁咁容易自家製，但奈何釀完後都要存放最少六個月先可以飲，真係等到頸都長囉，袁太之前係網上發覺好多Blog友都係用孖蒸釀，不過對我黎講太刺激喇，所以就改用清酒浸，味道可能會淡少少，不過清清地應該會仲啱我

而冰糖就用單晶冰糖，味道單純D，咁梅味就唔會被蓋住，袁太釀左兩樽，一樽留俾媽咪，唔知街市仲有冇青梅賣呢 ??? 買多幾磅番屋企釀多幾樽派街坊先得 !

首先買回來的青梅逐粒洗淨後抹乾，風乾一晚備用

浸梅酒材料(1L份量) : 青梅<300g>，單晶冰糖<166g>，清酒<600ml>，1L密封玻璃容器

唔用孖蒸，改用日本清酒，用白雪的上撰，酒清度15%-16%，酒身較輕

 
做法:
1. 先用牙籤把青梅的蒂挑出，否則酒會有苦味

2. 再用竹籤在梅身上刺小孔，讓梅的味道在泡浸時充份滲出

3. 洗淨玻璃容器，以廚房紙抹乾後，再用沾上少量清酒的廚房紙，內外抹擦玻璃容器以作消毒殺菌

4. 將青梅及冰糖相間放入玻璃容器內，再慢慢注入清酒，將容器蓋密封好，放在陰涼地方最少六個月才可飲用(不過浸足一年會更好，梅酒存放越耐，發酵成熟，味道會越醇厚)

寫埋日期同份量

真係好想快D有得飲 !