走牛 <附煙肉蛋黑豚豬肉漢堡包食譜>

今日天氣好熱，熱到我已經要著背心出街了，而且這種天氣心情都有少許差，心情差的情況去到咩都覺得唔順眼，番工做咩都好似唔順利，今日仲同老細嘈左幾句添，唔知會唔會俾人炒呢 ??? 哈 ...

好喇 ，心情唔多好自然就唔想煮飯(只不過係一個籍口)，但又諗唔到去邊度食好，係呢個時候~電話響起~，係袁生打黎，問我今晚想食咩，未諗呀~心情差，放工先算~

點知袁生提議想食漢堡包

以下袁生袁太電話中對話 :
袁太 : 漢堡包 ??? 咁我放工去麥當當買
袁生 : 我唔想食麥當當的包(因為袁生腳痛關係都唔可以食牛，嘻 ...)
袁太 : 咁既然大家都唔食牛，咁等我自製一個美味的漢堡包，你一定會喜歡(屋企附近街市有間專買黑豚豬的店鋪，買黑豚肉做豬肉漢堡，味道一定perfect)

但材料就麻煩你放工幫我買，我轉頭whatapps材料俾你，我做野先，你放工打俾我，其實整漢堡包都唔駛好多時間，就算放得夜都可以好快有得食，而且豬肉漢堡入面仲加左燕麥糠架，心理上都覺得健康D，落足料巨大漢堡包完成了 !

煙肉蛋黑豚豬肉漢堡包

材料 : 黑豚豬肉<$16>，桂格燕麥糠<1包>，洋蔥<半個>，麵包糠<20g>，雞蛋<3隻>，牛奶<40ml>，煙肉<3塊(1開2切)，生菜<2塊>，現成漢堡包<2個>

做法:
1. 洋蔥切碎後用慢火炒至金黃色盛起，將牛奶同麵包糠，燕麥糠拌勻備用

2. 黑豚豬肉加少許鹽拌勻，再將其餘材料及1隻雞蛋加入，加少許胡椒粉調味拌勻

3. 用手將所有材料混合，分成兩份，放在手上來回拍打，輕輕拍成圓形

4. 燒紅鑊，用中火將豬肉漢堡煎至兩面金黃色，加少計水加蓋焗5分鐘，盛起豬肉漢堡

5. 將煙肉加入鑊中煎香盛起，再將雞蛋煎至太陽蛋備用(太陽蛋有少許走樣)

6. 漢堡包放入焗爐焗片刻，取出放上生菜，煙肉，豬肉漢堡，太陽蛋即可

 

 

賣相味道都美麗同美味的漢堡包，當然唔少得仲有焗薯角