青口配蘋果酒煙肉醬 <附食譜>

青口 ??? 我一向唔多喜愛的食物，但袁生就非常之愛，唔知點解我總是覺得青口有陣怪味，不過當我有一日無無聊聊睇番之前錄過的烹飪節目(我有一個hard disk專係錄烹飪節目)，發現有個青口食譜，又係Jamie's Oliver的傑作

青口做法簡直超級簡單，而且賣相仲吸引到我，連我唔喜愛青口的人都想整黎試下，所以就去左吉吉島買左包藍青口，一包有成五十多隻，都係$58，而煮青口最主要材料就係蘋果酒，初時以為蘋果酒會好容易搵，點知搵左幾間超市都冇，不過好彩最後都俾我搵到

青口汁料有忌廉，有蘋果酒，仲有煙肉的香味，當然要去買條法包回來沾汁食，咁就可以連飯或者意粉都唔需要了

講左咁耐，大家係咪好想知個答案究竟好唔好味呢 ???  答案係 : 超級好味，真係好味到連我討厭青口的人都愛上了，其實係咪因為藍青口的味道冇普通街市買的大隻青口味道唔同呢，藍青口的味道我接受得到 !

香濃的忌廉汁當然唔可以浪費，將法包撕開沾上汁料一齊食 

味道甜甜地，真係唔錯，我同袁生都好鐘意

青口配蘋果酒煙肉醬 
材料 : 藍青口<30餘隻>，煙肉<4片>，荷蘭芹<適量>，淡忌廉<180ml>，蘋果酒<150ml>，蒜蓉<適量>，法包<半條>


做法 :
1. 青口洗淨，煙肉切條備用

2. 燒紅鑊，加少許橄欖油，加入煙肉爆香至金黃色盛起

3. 鑊不要洗，加入青口，蒜蓉，橄欖油拌勻，加入蘋果酒，蓋上鑊蓋用中火煮3分鐘至青口完全開口

4. 只將青口盛起放在碟內，煮青口汁料留在鑊內，加入忌廉轉慢火煮滾

5. 將一半份量煙肉同切碎的荷蘭芹放入忌廉中拌勻，煮至滾後倒入青口內

6. 最後再灑上其餘份量的煙肉即可