香辣豬肉年糕一丁麵 <附食譜>

大約幾個月前同袁生去韓食家食晚餐，不過由於當時唔係太肚餓的關係，所以只食左石頭飯同泡菜煎餅，但見到隔離枱叫左碗豬肉湯麵，又好似好正，不過真係食唔落，就將當時見到的畫面重新係袁太廚房裡面複製一次，既然係自家製作，就可以將辣的程度調到最低，不過韓式食物唔辣又唔好吃，咁就整住小辣先

 

另外仲有一個問題，韓式店所用的麵應該會係辛辣麵，但袁太本身唔太喜愛辛辣麵，如果將辛辣麵轉一丁麵會唔會好怪呢 ??? 當然唔會，都係麵姐，唔知複製品同原創的味道同賣相會唔會好大出入呢 !



香辣豬肉年糕一丁麵
材料 : 豬肉<$20>，韓式年糕<適量>，金菇<1包>，蔥粒<少許>，一丁麵<1包>，椰菜<半個>

材料(湯底) : 牛肉湯<1公升>，韓式辣椒粉<1湯匙>，韓式辣醬<1茶匙>，酒，蒜蓉<適量>，韓式醬油<2湯匙>，鹽<少許>

豬肉醃料 : 酒，糖，黑胡椒碎<少許>，韓式辣椒醬<3湯匙>，韓式辣椒粉，韓式醬油<1湯匙>，蘋果<半個(蘑成茸)>，糖，麻油<少許>


做法 :
1. 將豬肉切厚片，加入所有醃料拌勻醃2小時備用

2. 用約1/3份量的牛肉湯倒入碗中，將醬油，辣椒粉，辣椒醬，酒，蒜蓉，鹽加入牛肉湯內拌勻

3. 椰菜洗淨切片，金菇洗淨切去尾部備用，一丁麵用水煮至軟身隔去水份

4. 將椰菜，金菇放入煲內炒香，再加入年糕及一丁麵

5. 將之前拌勻好的牛肉湯加入煲內，再倒入其餘2/3份量的牛肉湯煮至滾後盛起放入大碗中

6. 燒紅鑊，將之前醃好的豬肉落鑊爆香，炒至熟透後盛起放入一丁麵內，最後灑上蔥粒即可