薑汁豬頸肉黃薑炒飯 <附食譜>

前日剩左冷飯放係雪櫃，所以今晚就簡簡單單整左炒飯做晚餐，炒飯呢樣野可以話好簡單，亦都可以話好複雜，炒得濕唔好食，最好炒得乾身少少，我就最喜愛，由細到大每當食炒飯我一定要加雜豆，而炒飯就一定會用雞蛋

我今次依然會用雜豆，不過就唔用雞蛋，因我係整黃薑飯炒底，再加煙肉碎，少許菜，仲有爽口彈牙的薑汁焗豬頸肉粒一齊炒，一大大碗炒飯做晚餐已經好滿足，我同袁生一人一大碗"飽飽"

當我想問袁生味道如何之際，個衰佬居然話好似炒得唔夠乾身，唔夠乾身 ??? 我已經炒到粒粒分明，唔黐鑊囉喎，何況我覺得食落口都唔係濕，都唔知係袁生要求高定係我唔喜愛人家對我煮的食物有投訴呢 ???



薑汁豬頸肉黃薑炒飯
材料 : 豬頸肉<1大塊>，煙肉<2片>，菜心莖，雜豆<適量>，冷飯<2碗>，黃薑粉<2茶匙>，黃薑飯醬料<1包>
醃汁 : 薑汁，生抽，糖，酒<適量>


做法:
1. 將豬頸肉洗淨抹乾水份，加入醃料拌勻醃2小時，放入焗爐用180C焗約20分鐘至兩面熟透，取出待涼切粒備用

2. 煙肉切碎，雜豆，菜心莖洗淨

3. 燒紅鑊，爆香黃薑飯醬料包，加入白飯拌勻，再加黃薑粉，少許生抽，鹽兜勻，炒至乾身盛起

4. 煙肉，菜心莖放入鑊中爆香至熟透，將黃薑炒飯回鑊兜勻，加入雜豆，薑汁豬頸肉粒拌勻快炒片刻即可


~喜愛的話可灑上蔥粒~