自家製茄汁豆 <附食譜>

唔知大家兒時喜唔喜愛食茄汁豆呢 ???

仲記得以前細路的時候，媽咪多數會買"是蜜味"茄汁豆回來加餸，簡簡單單蒸熱佢都可以送到幾碗飯，自從唔知幾多年前喜愛入廚房之後，就同罐頭好少接觸了(除左午餐肉同五香肉丁之外)，何況今朝訓醒突然痴左條筋想食茄汁豆，大家可能會想，超市一罐細size既十蚊都唔駛，突然想食都好方便(因為袁生都係咁諗)

但大家估錯了，袁太會自家製茄汁豆，因為廚房有黃豆，用來做茄汁豆就啱晒，當朝早番完奶奶到食飯之後，下午時候回到街市買餸，袁生打來叫我記得買茄汁豆，我話買咩呀，我今朝浸左黃豆自己整喎，點知電話中的袁生傳來幾句話 : "黐左線咩，超市有罐頭唔買，咁辛苦自己整，傻架"

超 ... 你咪理喇，而家係我整姐，又唔係叫你幫手整，咁多聲氣做咩呢

自家製茄汁豆的材料其實好簡單

做法亦都唔太難

自家製茄汁豆
材料 : 黃豆<1碗>，蕃茄<1個>，洋蔥<半個>，水<適量>，鹽，胡椒粉<少許>，茄汁<2湯匙>


做法 :
1. 將黃豆洗淨浸水3小時至軟身，洋蔥，蕃茄切細粒備用

2. 燒紅鑊，爆香洋蔥至微黃，加入蕃茄粒拌勻，加入適量水及黃豆

3. 滾後轉慢火煮30分鐘至黃豆完全軟身及水份收乾約一半，最後加入茄汁，鹽，胡椒粉調味拌勻

4. 蓋上蓋煮約10分鐘即可

 

當煮茄汁豆期間，突然想起冰箱有雞翼，快快手拎出來解凍，用茄汁豆煮雞翼，茄汁豆可以用來送飯，又係肉類可以食下，一舉兩得，夜晚開飯時候，見袁生猛咁食雞 翼，一句說話都冇講過，我就忍唔住問 : 做咩呀，好好味呀，係茄汁豆好味還是雞翼好味呀(因袁生唔係一個十分喜發食雞翼的人)

袁生細聲說，茄汁豆好味 !

茄汁豆煮雞翼
材料 : 自家製茄汁豆<1碗>，雞翼<8隻>


做法:
1. 雞翼解凍洗淨抹乾水份，加入薑汁，鹽，生粉，酒拌勻醃1小時

2. 燒紅鑊，將雞翼煎至兩面微黃色(不需要完全熟透)，盛起

3. 原鑊爆香茄汁豆，加入少許水拌勻，將雞翼放入茄汁豆內，蓋上蓋用慢火煮5分鐘即可