蟲草花冬菇鮮蝦豬肉餃 - 配金華火腿胡椒雞湯 <附食譜>

剛過去的星期天，袁太晨咁早八點醒左又訓唔番，突然又想包餃餃做晚餐，一於落街市買定材料，不過又要諗下今次用咩材料好呢 ???

以前多數都用木耳同豬肉，袁生當然唔太喜愛，因為有木耳，永遠有益的材料袁生多數唔多好，所以今次就決定用 ...... 冬菇，鮮蝦，豬肉，另外再加多一樣材料

就係 ... 蟲草花

蟲草花大家多數都會用作煲湯，炒或蒸，唔知有沒有人試過用來包水餃呢 ???，

今次袁太只包左22隻，每次食水餃我都好講究究竟用咩湯底好，由於晚餐除左水餃外，還有手撕雞做晚餐，一於用手撕雞剩下的雞殼煲鍋湯底吧，香濃的雞湯再配上自家製餃餃，當然係相當美味喇 !

從未試過用蟲草花做水餃餡料，唔知味道突唔突別呢 ???

每隻水餃都脹卜卜，好可愛呢

上次整手撕雞的時候用剩的雞殼，可以用來煲雞湯

蟲草花冬菇鮮蝦豬肉餃

材料 : 豬肉碎<$15>，新鮮基圍蝦<半斤>，蟲草花<1両>，冬菇<數隻>，水餃皮<適量>

醃料 : 生抽，糖，老抽，麻油，胡椒粉，生粉，水<適量>

做法 :

1. 蟲草花浸水10分鐘後洗淨切細條，冬菇浸水至軟身後切粒

2. 鮮蝦去殼去腸切粒

3. 所有材料放入大碗中，加入醃料拌勻醃30分鐘，再放入雪櫃下層冷凍1小時

4. 將適量餡料放在餃皮中間位置，搽少許水在餃皮邊後對摺封口

5. 由左至右摺數下，放在灑上生粉的碟上即可

金華火腿胡椒雞湯

材料 : 金華火腿<4片>，熟雞殼<半隻>，白胡椒粒，黑胡椒碎<適量>

做法 :

1. 金華火腿沖水備用

2. 煲內放入適量水，加入金華火腿，白胡椒粒，雞殼用大火煲滾

3. 轉慢火煲2 1/2小時，加入少許鹽，黑胡椒碎，胡椒粉調味即可

適量的水餃放上碟，隔水用大火蒸3分鐘，盛起放在另一碟上，放上自己喜愛蔬菜墊底，再淋上胡椒雞湯，再隔水用大火蒸10分鐘即可