杏汁雪耳芝麻湯丸 <附食譜>

大家中秋節過得高唔高興，開唔開心呢，我同袁生就平凡中度過，只係番左娘家吃飯，同奶奶老爺食下飯咁，都冇咩特別，因為袁生呢幾日好似想作病，都係早少少回家休息好D，始終家中還有老狗BB，無理由要BB一支公係屋企做悶悶豬，佢今年已經冇月餅食好可憐架喇，因為袁太唔得閒整，又唔記得左去訂狗狗月餅，所以 ...

好喇，唔知大家中秋的時候有冇食湯丸的習慣呢 ???

袁太年年都有食架，所以今年亦唔例外，仲記得上年整左南瓜湯丸同綠茶湯丸，袁生好似唔係太喜愛，都係整番普通的芝麻湯丸穩陣D，但又唔想用片糖或冰糖煮，太過單調，就決定整個杏汁底，再加潤潤的雪耳，好味道呢

袁生一向好喜愛杏汁，所以呢個甜品湯丸當然合格兼過關 !

杏汁雪耳芝麻湯丸

杏汁雪耳材料 : 龍皇杏<150g>，南北杏<10g>，白米<1湯匙>，水，冰糖<適量>，雪耳<1個>

做法 :

1. 龍皇杏，南北杏，白米用水浸4小時，去水備用，雪耳浸水至軟

2. 將材料加水放入攪拌機打爛，倒出用隔篩渣成杏汁，此步驟重複三次

3. 杏仁汁放入煲內，加入雪耳用慢火煮至滾，再加入冰糖煮至溶即可

芝麻湯丸材料 : 糯米粉<200g>，水，芝麻餡<適量>

做法 :

1. 糯米粉逐少加入水搓成光滑粉糰

2. 將搓成的粉糰搓成長條形，再依照分好的餡料約2倍的大小搓成小糯米糰

3. 糯米糰放在手中壓扁，將適量芝麻餡料放入，慢慢將糯米糰包住餡料

4. 然後將收口揑緊，在手心中搓成圓形即可

最後煲內放入適量水，用大火將湯丸煮約5分鐘至浮起，盛起放入之前煲好的杏汁雪耳內拌勻，用慢火再煮熱即可

中秋節除左湯丸外，當然唔少得仲有月餅同生果，今年袁太冇時間整自家製月餅，唯有出街買一個回來頂替，生果就買左水晶梨，豐水梨同林柿，好滿足呢