煙肉粟米天使麵拌南瓜湯

今日又唔想食飯 , 本應想食通粉 , 但袁生唔愛通粉

咁就不如煮意粉 , 不過袁生亦唔愛意粉

他唯獨愛的是 ...... 天使麵



其實煮天使麵我都冇咩所謂 , 因我本身唔太偏食呢 (除榴槤同三文魚外)

~哼~ 呢兩樣食物真係唔好攪我 , 三文魚壽司 , 煙三文魚我統統討厭

但三文魚頭就十分喜愛呢



既然答應袁生煮天使麵 , 就要想想用什麼汁料 , 起初想用白汁海鮮煮

但最後都用南瓜湯做底

用南瓜 + 海鮮煲出來味道濃郁 , 又甜甜地 , 用來拌麵原來好好味呢

不過煮南瓜湯已經用上不少材料

首先要煲南瓜湯先 , 將南瓜去皮去籽放入煲內煲1小時 , 什錦海鮮粒用醃料拌勻後出水 , 蝦剪去鬚及腳洗淨抹乾水份

南瓜煲了1小時後 , 再加薯仔 , 鮮蝦及海鮮粒再煲 , 煲約30分鐘將蝦盛起去殼 , 蝦肉放回煲內備用

煲好南瓜湯後將天使麵放入水中煮散 , 再放入南瓜湯內拌勻 , 先將天使麵放上碟 , 再淋上南瓜湯 , 最後將煙肉及粟米放入鑊中炒香 , 盛起放上面就可以了

另外又怕一碟天使麵會唔夠飽 , 去左超市買包煙三文魚回來 , 簡單加上雞蛋及生菜 , 芥末醬做成沙律 , 不過大家都睇到袁太係唔食煙三文魚呢 , 所以碟沙律就雙手奉獻俾袁生了

唐生菜撕去外面兩三塊 , 將較青綠的生菜切段再洗淨 , 放入冰箱冷藏都可以變得爽脆

再加上烚熟的雞蛋切片 , 放上煙三文魚 , 加自己喜愛的沙律汁拌勻就OK了

材料 (煙肉粟米天使麵拌南瓜湯)
天使麵 , 煙肉 , 粟米粒 , 基圍蝦半斤 , 南瓜半邊 , 急凍什錦海鮮粒1包 , 薯仔1個

醃料 
鹽 , 胡椒粉 , 麻油



做法
1. 南瓜去皮去籽切片 , 基圍蝦剪去鬚及腳部份連殼洗淨抹乾水份備用

2. 海鮮粒解凍後加入醃料拌勻醃30分鐘後出水

3. 煲內放入適量水 , 滾後加入南瓜用大火火煲1小時 , 再加入基圍蝦 , 薯仔及海鮮粒用大火煲15分鐘後轉慢火煲30分鐘

4. 基圍蝦盛起去殼 , 將蝦肉放回湯中

5. 天使麵放入水中煮4分鐘 , 盛起放入南瓜湯內拌勻

6. 首先將天使麵夾起放上碟 , 再將南瓜湯淋在天使麵上

7. 燒紅鑊 , 將煙肉及粟米粒炒香 , 盛起放在天使麵上拌勻即可




有湯有海鮮有麵有沙律的晚餐 , 好滿足呢 ^^