煙肉雜菜薯蓉煎蛋角

 

上次煲蕃茄薯仔湯用剩一個薯仔咁多多

本應諗住再encore煲多次薯仔湯 , 但天氣涼涼地又唔想落街買材料

就係百寶箱找找有冇剩餘物資 , 發現冰箱有煙肉

雪櫃有雞蛋 , 洋蔥同椰菜 , 夠了 , 夠材料整煎蛋角 ......



平時袁家晚餐系列 , 多數都會出現蛋餅 , 蛋角菜式

例如 : 蓮藕餅 , 蒸/煎肉餅等等

今次就決定整最容易的煎蛋角 , 袁太喜愛煎蛋角的原因

因只用簡單材料 , 再材料切切切 , 炒炒炒 , 加入蛋液一同拌勻

食前放入鑊中煎至金黃就食得 , 而且仲好好送飯



今次蛋角主打全部都係雪櫃剩餘物資 , 再加上薯仔

不過唔係將薯仔切絲或刨絲 , 而係將薯仔整成薯蓉

連同蛋液一同拌勻後去煎

除有蛋香味外 , 仲有食到薯蓉香滑的感覺 ~讚~

 

材料 : 薯仔 , 椰菜 , 煙肉 , 雞蛋 , 紫洋蔥 , 蔥粒 , 芹菜(裝飾可省略) , 鹽 , 黑胡椒碎

薯仔去皮切厚片放上碟 , 放入鑊中隔水用中火蒸20分鐘後熄火焗5分鐘 , 取出放入大碗內 , 加少許鹽 , 黑胡椒碎拌勻壓成蓉

洋蔥去皮切細粒 , 煙肉切細片 , 蔥大部份切粒 , 小部份切幼絲 , 椰菜洗淨切幼絲

燒紅鑊 , 爆香洋蔥及煙肉後加入椰菜拌勻 , 加少許水拌勻蓋上蓋煮至椰菜軟身

將雞蛋打入大碗內拌勻 , 逐一加入薯蓉拌勻至幼滑

再加入洋蔥煙肉及椰菜拌勻 , 最後加入蔥粒拌勻靜置10分鐘 

燒紅鑊 , 將適量的蛋液放入鑊中煎至半凝固 , 再用鑊鏟將蛋液對摺成蛋角型 , 慢慢煎至兩面金黃色

盛起放在廚紙上吸取油份 , 上碟後再灑上蔥絲即可

材料
薯仔1個 , 椰菜1個 , 煙肉2片 , 雞蛋4隻 , 紫洋蔥1個 , 蔥粒 , 芹菜(裝飾可省略) , 鹽 , 黑胡椒碎



做法
1. 薯仔去皮切厚片放上碟 , 放入鑊中隔水用中火蒸20分鐘後熄火焗5分鐘

2. 取出放入大碗內 , 加少許鹽 , 黑胡椒碎拌勻壓成蓉

3. 洋蔥去皮切細粒 , 煙肉切細片

4. 蔥大部份切粒 , 小部份切幼絲 , 椰菜洗淨切幼絲

5. 燒紅鑊 , 爆香洋蔥及煙肉後加入椰菜拌勻 , 加少許水拌勻蓋上蓋煮至椰菜軟身 

6. 將雞蛋打入大碗內拌勻 , 逐一加入薯蓉拌勻至幼滑 

7. 再加入洋蔥煙肉及椰菜拌勻 , 最後加入蔥粒拌勻靜置10分鐘  

8. 燒紅鑊 , 將適量的蛋液放入鑊中煎至半凝固

9. 再用鑊鏟將蛋液對摺成蛋角型 , 慢慢煎至兩面金黃色

10. 盛起放在廚紙上吸取油份 , 上碟後再灑上蔥絲即可

 

香香滑滑的薯蓉煎蛋角 , 唔知大家喜唔喜愛呢 ^^