黑胡椒蘿蔔炆牛筋牛展

袁生係一個愛吃牛展牛腩的人 , 所有久唔久袁太就會係街市睇睇有冇靚靚牛腩或牛展

不過牛腩我就唔太鐘意食 , 牛展都還可以 

我呢邊街市的靚牛展唔係日日有 , 要買到靚的當然要靠彩數 , 剛巧某日見到有靚牛展

快快手買條回家 , 一條$29大洋 , 其實算平定貴呢 ......


  
買牛展回家放入冰箱冷藏 , 喜愛的時候就拎出黎用來滷 , 用來炆 , 切片炒或煲牛肉湯

之但係我同袁生最愛都係用來炆 , 而且一定要加白蘿蔔同牛筋 , 白蘿蔔就袁生指定要

而牛筋就我指定要既 , 最愛簡單用八角 , 月桂葉來個清湯製法 , 後來見廚房仲有包黑胡椒粒

加少少落去一齊炆 , 有啖啖的黑胡椒香味 , 而且牛筋 , 牛展又炆得好軟身

無論配白飯 , 或其他粉麵都得



起初一早炆好 , 接近黃昏的時候又落好米煮飯 , 點知個麻煩友又出動

話今次想用來配河粉喎 , 以往的我一定會鬧爆佢點解唔早d講 , 但現在都冇咁好氣

佢話要河粉就河粉 , 我仍然會盡量配合 , 等我立即飛去街市買半斤河粉回家

煮好的白飯就留待明天用來炒飯 , 唔好浪費 



大大煲的蘿蔔牛筋牛展 , 大家會喜愛食邊樣多D ??? 袁太有個問題想請教大家

白蘿蔔頭頂的葉其實有咩用途可以用 , 大家知道的話可以告知我呢 ^^



材料 : 白蘿蔔 , 牛展 (金錢展) , 牛筋 , 月桂葉 , 八角 , 薑 , 蔥 , 冰糖 , 黑胡椒粒 , 水 , 隔篩 , 葉仔 (裝飾可省略)

蔥洗淨分別切段及切粒 , 薑去皮切片 , 鑊中加入薑片 , 蔥段及酒煮滾 , 放入牛展及牛筋蓋上蓋用中火先出水5分鐘 , 將牛展先盛起沖一沖洗 , 牛筋繼續蓋上蓋用中火出水10分鐘後熄火焗20分鐘 , 取出牛筋切件

燒紅鑊 , 爆香薑片及黑胡椒粒 , 加入牛展(原條) , 牛筋 , 贊少許酒炒香 , 加入5碗份量水 , 再加入八角 , 月桂葉及冰糖拌勻用中火煮滾 , 蓋上蓋轉慢火炆1小時 , 炆期間將白蘿蔔去皮切件

1小時後加入白蘿蔔拌勻蓋上蓋用繼續慢火炆30分鐘 , 將牛展盛起切厚件放回鑊中拌勻蓋10分鐘

將材料放入煲 , 碗或碟內 , 灑上蔥粒即可

材料 
白蘿蔔1條 , 牛展 (金錢展)1條 , 牛筋1條 , 月桂葉6片 , 八角2粒 , 薑 , 蔥 , 冰糖 , 黑胡椒粒2湯匙 , 水 , 隔篩 , 葉仔 (裝飾可省略)



做法
1. 蔥洗淨分別切段及切粒 , 薑去皮切片

2. 鑊中加入薑片 , 蔥段及酒煮滾 , 放入牛展及牛筋蓋上蓋用中火先出水5分鐘

3. 將牛展先盛起沖一沖洗

4. 牛筋繼續蓋上蓋用中火出水10分鐘後熄火焗20分鐘 , 取出牛筋切件

5. 燒紅鑊 , 爆香薑片及黑胡椒粒

6. 加入牛展(原條) , 牛筋 , 贊少許酒炒香 , 加入5碗份量水

7. 再加入八角 , 月桂葉及冰糖拌勻用中火煮滾 , 蓋上蓋轉慢火炆1小時

8. 炆期間將白蘿蔔去皮切件

9. 1小時後加入白蘿蔔拌勻蓋上蓋用繼續慢火炆30分鐘 

10. 將牛展盛起切厚件放回鑊中拌勻蓋10分鐘

11. 將材料放入煲 , 碗或碟內 , 灑上蔥粒即可 




蘿蔔軟滑 , 牛展 , 牛筋好軟身 , 炆左一大煲都唔夠我地兩個人食呀 ~~~