雜菜清湯炆牛展

雪櫃常常有食不完的蔬菜 , 例如西芹 , 椰菜 , 南瓜 , 甘旬 , 薯仔等等 , 每次見百寶箱

有咁多剩餘物資 , 最好的辦法當然盡快來個清清雪櫃大行動 , 用來炆就最適合不過 ......



本來呢堆蔬菜我係想用來炆豬肉 , 但麻煩友又話想食牛

講開食牛 , 袁生最愛牛腩同牛展 , 不過住個區要買到靚牛展係要睇彩數 

不過好幸運地買個日牛展都唔太差 , 就買左兩條回家配蔬菜炆

其實袁太細細聲同大家講 ~~其實我唔係太愛牛展架~~ 不過見袁生最近畫圖真係好辛苦

由朝畫到晚 , 又由凌晨畫到朝早 , 不間斷冇停過咁 , 反而我就冇咩可以幫到佢手

畫圖我就唔得呢 , 唯一只可以整袁生喜愛的食物等佢可以放鬆下心情 , 唔好迫自己太緊



牛展對我來說 , 煮法都可以好似雞翼咁百搭 , 如果大家唔想好似袁太用來炆的話

轉用牛展來燉湯 , 用來滷 , 用來炒都一樣好味道 , 我最愛用清湯去炆 , 炆完味道清清地

而且牛展炆得好軟身 , 配飯或配其他粉麵都得 , 起初一早炆好 , 接近黃昏的時候

又落好米煮飯 , 點知 ...



袁生話今次想用來配河粉喎 , 以往的我一定會鬧爆佢點解唔早d講

但現在唔會喇 (暫時) , 見佢工作咁辛苦賺錢都係為左呢頭家姐 , 而且佢只係要求配河粉

我當然非常配合 , 立刻飛去街市買斤半河粉回家呢 ^^



材料 : 急凍牛展 , 甘旬 , 薯仔 , 西芹 , 蔥 , 月桂葉 , 八角 , 薑 , 酒 , 水 , 冰糖

蔥切段及切幼絲 , 薑去皮切片 , 煲內加入水 , 一半份量薑片及蔥段 , 放入牛展蓋上蓋出水10分鐘 , 盛起沖洗乾淨瀝乾水份

鑊內加入其餘份量的薑片及蔥段爆香 , 加入牛展拌勻 , 夾起蔥段去掉後加入約6杯水份量的水 , 月桂葉 , 八角及冰糖拌勻 , 用中火煮滾後蓋上蓋轉慢火炆45分鐘

炆牛展期間將西芹去纖維 , 薯仔 , 甘旬去皮 , 分別將西芹切段 , 薯仔及甘旬切件

 
45分鐘後加入甘旬 , 薯仔拌勻用中火煮滾 , 再蓋上蓋轉用慢火炆30分鐘 , 將牛展盛起切件再回鑊 , 加入西芹段拌勻用中火煮滾後熄火焗30分鐘

盛起材料放上碟 , 再放上八角及月桂葉 , 最後灑上蔥絲即可 

材料
急凍牛展2條 , 甘旬1條 , 薯仔2個 , 西芹 , 蔥 , 月桂葉5片 , 八角3粒 , 薑 , 酒 , 水 , 冰糖2大粒



做法
1. 蔥切段及切幼絲 , 薑去皮切片

2. 煲內加入水 , 一半份量薑片及蔥段 , 放入牛展蓋上蓋出水10分鐘

3. 盛起沖洗乾淨瀝乾水份

4. 鑊內加入其餘份量的薑片及蔥段爆香 , 加入牛展拌勻

5. 夾起蔥段去掉後加入約6杯水份量的水 , 月桂葉 , 八角及冰糖拌勻

6. 用中火煮滾後蓋上蓋轉慢火炆45分鐘

7. 炆牛展期間將西芹去纖維 , 薯仔 , 甘旬去皮 , 分別將西芹切段 , 薯仔及甘旬切件

8. 45分鐘後加入甘旬 , 薯仔拌勻用中火煮滾 , 再蓋上蓋轉用慢火炆30分鐘

9. 將牛展盛起切件再回鑊

10. 加入西芹段拌勻用中火煮滾後熄火焗30分鐘 

11. 盛起材料放上碟 , 再放上八角及月桂葉 , 最後灑上蔥絲即可 




用多種蔬菜來炆牛展 , 可以清晒雪櫃的剩餘物資外 , 而且味道超乎想像咁好味呢 ^^