菜乾臘鴨絲豬骨粥

將時間回到聖誕夜當日 , 剛過去的聖誕節大家有冇食聖誕大餐 , 我每年到呢個節日都會煮下西餐同袁生在家過 , 之但係今年唔想煮西餐 , 反而想食粥 ......



講起粥的問題 , 袁生只愛菜乾粥 , 而我就喜愛白粥 , 魚腩弼或者豬骨粥 , 剛巧冰箱有一條豬手骨 , 係冬至的時候整豬手剩下的骨頭 , 本應用來煲湯 , 不過又俾我轉用來煲粥 , 後來又係雪櫃搵到隻臘鴨脾 , 又想用埋黎煲粥 , 所以個粥都用左好多材料一齊煲 , 絕對夠足料 , 袁太煲呢個粥絕對唔馬虎架 , 先將豬手骨同臘鴨脾放入煲 , 加水先煲成個粥湯底 , 然後再逐一放入其餘材料 , 只需煲30分鐘就得 , 本身臘鴨脾已經夠鹹 , 唔需要再落鹽已經好夠味



我仲將臘鴨肉撕成絲 , 食的時候就方便得多 , 由於粥入面有菜乾 , 袁生都不知幾鐘意 , 一路食唔停 , 不過最衰冇買油條 , 如果有埋油條就更加正呢 ^^

材料 : 豬手骨 , 菜乾 , 臘鴨脾 , 白米 , 燒豬骨/肉 , 薑 , 芫茜 , 蔥 , 鹽 , 糖 , 油

豬手骨及臘鴨脾放入器皿內 , 加入熱水浸10分鐘去油份 , 白米洗淨放入大碗內 , 加入少許鹽及油拌勻 , 加入水浸過面靜待30分鐘 , 菜乾亦加水浸過靜待30分鐘 , 浸10分鐘的豬手骨及臘鴨脾用水沖洗乾淨及瀝乾

豬手骨 , 臘鴨脾放入煲內 , 加入適量水用中火煮滾 , 蓋上蓋繼續用中火煲45分鐘 , 期間要經常睇下 , 以免煲瀉

薑去皮切細粒 , 芫茜莖切細段 , 蔥切粒及幼絲 , 浸好的菜乾用水沖洗 , 渣乾水份後切碎 , 切碎後再用水沖洗一次及瀝乾 , 白米浸好後倒去水份及瀝乾

煲45分鐘的粥底熄火焗15分鐘 , 將豬手骨及臘鴨脾盛起 , 臘鴨脾撕成絲

 

逐一將薑粒 , 白米 , 菜乾 , 燒豬骨/肉及臘鴨絲放入粥底內拌勻 , 用中火煲滾後蓋上蓋轉慢火煲30分鐘 , 期間每5分鐘將粥拌勻一次以免黏底

最後將芫茜莖及少許胡椒粉調味拌勻 , 熄火焗10分鐘即可

材料 
豬手骨1隻 , 菜乾1扎 , 臘鴨脾1隻 , 白米1杯 , 燒豬骨/肉 , 薑 , 芫茜 , 蔥 , 鹽 , 糖 , 油



做法
1. 豬手骨及臘鴨脾放入器皿內 , 加入熱水浸10分鐘去油份 

2. 白米洗淨放入大碗內 , 加入少許鹽及油拌勻 , 加入水浸過面靜待30分鐘 

3. 菜乾亦加水浸過靜待30分鐘 

4. 浸10分鐘的豬手骨及臘鴨脾用水沖洗乾淨及瀝乾

5. 豬手骨 , 臘鴨脾放入煲內 , 加入適量水用中火煮滾 , 蓋上蓋繼續用中火煲45分鐘 

6. 期間要經常睇下 , 以免煲瀉

7. 薑去皮切細粒 , 芫茜莖切細段 , 蔥切粒及幼絲

8. 浸好的菜乾用水沖洗 , 渣乾水份後切碎 , 切碎後再用水沖洗一次及瀝乾 

9. 白米浸好後倒去水份及瀝乾

10. 煲45分鐘的粥底熄火焗15分鐘 , 將豬手骨及臘鴨脾盛起 

11. 臘鴨脾撕成絲

12. 逐一將薑粒 , 白米 , 菜乾 , 燒豬骨/肉及臘鴨絲放入粥底內拌勻

13. 用中火煲滾後蓋上蓋轉慢火煲30分鐘 , 期間每5分鐘將粥拌勻一次以免黏底 

14. 最後將芫茜莖及少許胡椒粉調味拌勻 , 熄火焗10分鐘即可 




超正的豬骨粥 , 天氣凍食一碗好暖胃 , 如果大家唔鐘意用豬骨 , 可以用魚腩代替呢 ^^