枇杷貢梨冰糖水

某日突然間想食冰凍的糖水 , 例牌問袁生想食咩 , 佢的回覆一定係綠豆沙 , 不過大家都知綠豆沙我就麻麻地 , 所以我一時間已經否決左 ......

之後無無聊聊就走去街市搵靈感 , 其實就係盲中中係街市呢度行下 , 個度又行下 , 睇下有咩材料可以買黎煮糖水 , 行下行下經過生果店見到有佢 ~枇杷果~

枇杷果以往買回來只會俾袁生做飯後果 , 我知枇杷果可以止咳潤肺 , 用黎煮糖水應該都唔差 , 當我係生果店買枇杷果的時候 , 個姐姐問我用黎點食 , 我話想用黎煲糖水 , 咁個姐姐就幫我選擇d半生熟既 , 而且仲教我可以配貢梨同杞子一齊煲 , 仲話煲30分鐘就可以 , 呢個配搭我好似未曾聽過 , 不過想想貢梨有甜又滋潤 , 杞子又有益 , 最重要係我根本未諗到用咩黎煲 , 咁就一於照個姐姐講法 , 買齊所需材料就回家



回家跟足生果店姐姐教我的方法 , 放入所有材料(除左杞子)煲佢30分鐘後 , 先再加杞子焗一陣就完成 , 呢個糖水可以熱飲或凍飲 , 我同袁生都一樣選擇左凍飲 , 咁煲好後放入雪櫃一至豕粒鐘 , 雪到冰冰凍凍 , 一人一杯或一碗 , 好透心涼 , 好鬼正呢 ^^

材料 : 枇杷果 , 貢梨 , 杞子 , 冰糖 , 水

枇杷果及貢梨去皮 , 分別將貢梨去芯切薄片 , 枇杷果切半去白色膜及核

煲內放入枇杷果 , 貢梨片 , 冰糖及1500ml水 , 用中火煮至微滾及冰糖完全溶掉後 , 蓋上蓋轉用慢火煮30分鐘 , 期間將杞子用水沖洗乾淨及瀝乾

30分鐘後加入杞子拌勻熄火焗10分鐘即可

材料
枇杷果5個 , 貢梨1個 , 杞子 , 冰糖 , 水1500ml



做法
1. 枇杷果及貢梨去皮  , 分別將貢梨去芯切薄片 , 枇杷果切半去白色膜及核 

2. 煲內放入枇杷果 , 貢梨片 , 冰糖及1500ml水 

3. 用中火煮至微滾及冰糖完全溶掉後 , 蓋上蓋轉用慢火煮30分鐘 

4. 期間將杞子用水沖洗乾淨及瀝乾 

5. 30分鐘後加入杞子拌勻熄火焗10分鐘即可




金金黃黃冰凍的滋潤糖水 , 有冇人想試一碗呢 ^^