脆脆鮮蝦餃子餅

昨天在街市發現海鮮剛剛到貨 , 基圍蝦大大隻 , 快快手買一斤回家 , 心想簡單來個白灼蝦好唔好 , 因為記得前幾日袁生吩咐過 , 如果見到有靚靚的蝦賣 , 一定要整白灼蝦俾佢 ......



當我同袁生講話買到靚靚的蝦時 , 佢居然又話唔想食白灼蝦 , 轉想食蝦餅喎 , 好 ~~~ 就將一斤蝦剁成蝦泥狀 , 剁好蝦後又發現只有蝦做材料又過於平凡 , 咁就試試在百寶箱找下有什麼剩餘物資可以用黎做蝦餅 , 好彩地俾我找到小棠菜同餃子皮 , 應該又係唔知幾時包餃子的時候用剩 , 放入雪櫃之後又唔記得左佢的存在 , 大家又估唔估到袁太會如何處置呢堆材料呢 ???



好簡單 , 我會用黎整餃子餅 , 用蝦泥同小棠菜做餡 , 用餃子皮夾住 , 再放入鑊煎至兩面金黃色脆卜卜 , 雖然製成品完成後袁生話咁樣整蝦餅好似覺得怪怪的 , 不過見佢食完一件又一件 , 袁太第一時間問佢 , 袁生的答案 : 估唔到咁好味喎 , 剩下的蝦頭蝦殼我當然唔會去掉咁浪費 , 留起放入冰箱 , 翌日會再用黎煮個湯呢 ^^



材料 : 基圍蝦 , 小棠菜 , 餃子皮 , 鹽 , 生粉 , 麻油 , 酒 , 黑胡椒碎 , 叉

基圍蝦去頭去殼去腸(蝦殼蝦頭留起) , 將蝦肉用水沖洗乾淨 , 用刀拍蝦肉 , 再剁成蝦泥 , 小棠菜加少許鹽 , 加水浸過面靜待10分鐘後 , 將小棠菜切碎 , 用水沖洗及瀝乾

將小棠菜粒放入鑊中 , 加少許鹽調味拌勻 , 蓋上蓋焗煮3分鐘至小棠菜軟身

 

將蝦泥放入大碗內 , 加入醃料拌勻後再加入小棠菜粒拌勻 , 用手撻十餘下 , 蓋上保鮮紙放入雪櫃靜待30分鐘

30分鐘從雪櫃取出靜待10分鐘 , 餃子皮平放 , 將餡料平均放在餃子皮上 , 再蓋上另一塊餃子皮 , 並用叉在表面上吉洞

燒紅鑊 , 將餃子餅放入鑊中用慢火慢慢煎至兩面金黃色脆身 , 內餡蝦肉熟透 , 盛起吸取油份即可

材料
基圍蝦1斤 , 小棠菜1/2斤 , 餃子皮 , 鹽 , 生粉 , 麻油 , 酒 , 黑胡椒碎 , 叉

醃料
生粉 , 麻油 , 鹽 , 酒 , 黑胡椒碎



做法
1. 基圍蝦去頭去殼去腸(蝦殼蝦頭留起) , 將蝦肉用水沖洗乾淨 

2. 用刀拍蝦肉 , 再剁成蝦泥 

3. 小棠菜加少許鹽 , 加水浸過面靜待10分鐘後 , 將小棠菜切碎 , 用水沖洗及瀝乾

4. 將小棠菜粒放入鑊中 , 加少許鹽調味拌勻 

5. 蓋上蓋焗煮3分鐘至小棠菜軟身

6. 將蝦泥放入大碗內 , 加入醃料拌勻後再加入小棠菜粒拌勻 , 用手撻十餘下

7. 蓋上保鮮紙放入雪櫃靜待30分鐘

8. 30分鐘從雪櫃取出靜待10分鐘 

9. 餃子皮平放 , 將餡料平均放在餃子皮上 , 再蓋上另一塊餃子皮 

10. 並用叉在表面上吉洞

11. 燒紅鑊 , 將餃子餅放入鑊中用慢火慢慢煎至兩面金黃色脆身 , 內餡蝦肉熟透

12. 盛起吸取油份即可 




用餃子皮夾餡料做成的餃子餅 , 煎到表面金黃色脆卜卜 , 好鬼美味呢 ^^