摩摩喳喳

有人只喜愛冬天食碗熱辣辣的糖水 , 但我同袁生就一年四季 , 每時每刻都會突然想食甜品或糖水 , 摩摩喳喳呢款就係我近期最愛的糖水 , 熱食得 , 凍食亦得 ......

其實整呢款甜品彈性都好大 , 屋企或廚房有咩就放咩落去煮 , 不過我曾經係街食既 , 都只係用簡單的芋頭 , 蕃薯及西米做材料 , 我就已經覺得好好味道 , 所以自己整都會選擇用番呢堆材料做主打 , 又或者我覺得整呢個摩摩喳喳 , 最主要都係個椰漿糖水底 , 我就另外加左幾塊斑蘭葉落去一齊煮 , 咁就變得好鬼香



我煮呢個糖水會預先將芋頭 , 蕃薯蒸熟 , 咁到時煮好糖水之後加入拌勻就可以 , 唔會煮到一pat pat呢 , 不過我材料中亦會用上紫色蕃薯 , 所以糖水底的顏色會變得比較紫色 , 唔會係白色糖水底的顏色呢 ^^

材料 : 黃蕃薯 , 紫蕃薯 , 芋頭 , 冰糖 , 斑蘭葉 , 西米 , 眉豆 , 椰漿 , 水

眉豆放入大碗內加熱水浸20分鐘 , 期間將芋頭 , 黃蕃薯 , 紫蕃薯分別去皮切粒 , 將浸20分鐘的眉豆倒去水份瀝乾 , 放入煲內加水浸過面 , 拌勻用慢火煮15分鐘至淋身 , 盛起用水沖一沖洗及瀝乾

芋頭粒放上碟 , 放入電蒸鍋內蓋上蓋蒸20分鐘 , 再逐一將黃蕃薯粒及紫蕃薯粒同樣放入電蒸鍋內蓋上蓋蒸20分鐘 , 放在錫紙上待涼備用

期間將西米放入煲內 , 加入水蓋過面 , 用慢火慢慢拌勻煮至西米透明 , 盛起西米用水沖洗乾淨 , 加入冰水浸10分鐘 , 10分鐘後瀝乾水份

煲內加入冰糖及1500ml水用中火煮至糖溶 , 加入斑蘭葉蓋上蓋用中火煮10分鐘至出味 , 倒入椰漿拌勻再煮滾 , 盛起斑蘭葉去掉 , 逐一加入眉豆 , 芋頭粒 , 黃蕃薯粒 , 紫蕃薯粒及西米拌勻 , 蓋上蓋用中火煮5分鐘 , 期間小心滾瀉 , 再熄火焗10分鐘即可 

材料
黃蕃薯2條 , 紫蕃薯2條 , 芋頭1/2個 , 冰糖120g , 斑蘭葉4塊 , 西米 , 眉豆 , 椰漿600ml , 水1500ml



做法
1. 眉豆放入大碗內加熱水浸20分鐘 

2. 期間將芋頭 , 黃蕃薯 , 紫蕃薯分別去皮切粒 , 將浸20分鐘的眉豆倒去水份瀝乾 

3. 放入煲內加水浸過面 , 拌勻用慢火煮15分鐘至淋身 , 盛起用水沖一沖洗及瀝乾

4. 芋頭粒放上碟 , 放入電蒸鍋內蓋上蓋蒸20分鐘 

5. 再逐一將黃蕃薯粒及紫蕃薯粒同樣放入電蒸鍋內蓋上蓋蒸20分鐘 

6. 放在錫紙上待涼備用 

7. 期間將西米放入煲內 , 加入水蓋過面 , 用慢火慢慢拌勻煮至西米透明

8. 盛起西米用水沖洗乾淨 , 加入冰水浸10分鐘 , 10分鐘後瀝乾水份 

9. 煲內加入冰糖及1500ml水用中火煮至糖溶 

10. 加入斑蘭葉蓋上蓋用中火煮10分鐘至出味 

11. 倒入椰漿拌勻再煮滾 , 盛起斑蘭葉去掉 

12. 逐一加入眉豆 , 芋頭粒 , 黃蕃薯粒 , 紫蕃薯粒及西米拌勻 

13. 蓋上蓋用中火煮5分鐘 , 期間小心滾瀉 , 再熄火焗10分鐘即可

   

多料版的摩摩喳喳 , 有冇朋友仔想試一碗呢 ^^