哈蜜瓜蟲草花百合豬展湯

每逢夏天 , 我都喜愛買水果用來煲湯或煮餸 , 皆因用水果煲的湯水在夏天方面 , 可以有消暑功效 , 秋天就有滋潤功效 , 以往只會用雪梨 , 貢梨及西瓜皮煲湯的我 , 今次就轉用哈蜜瓜皮來煲 , 事關袁生前幾天買了一個哈密瓜回家 , 瓜肉就用來做飯後果 , 瓜皮就用黎煲湯 ......



起初想用螺頭煲 , 但發現原來家中已經沒有 , 咁可以轉用咩材料呢 ??? 百合 ??? , 袁生一向都唔太愛百合 , 但百合有利尿作用 , 而且對煙酒過多人士飲用都好適合 , 麻煩友平時食咁多煙 , 呢款湯一定啱佢飲 , 另外加埋蟲草花 , 紅蘿蔔 , 豬展一齊煲 , 煲呀煲 ~~~ 煲左兩個幾鐘 , 煲到百合都溶晒 , 甜甜地又濃濃地 , 好味道



水果的皮用黎煲湯就絕對唔會浪費 , 大家下次買水果回家的時候 , 記得睇下水果皮可唔可以用黎煲湯先好掉呢 ^^

材料 : 哈蜜瓜皮 , 蟲草花 , 百合 , 豬展 , 蜜棗 , 南北杏 , 果皮(預先浸軟) , 紅蘿蔔 , 鹽

豬展放入煲內加水 , 用中火煮滾後盛起用水沖一沖洗及瀝乾 , 蟲草花浸水10分鐘後瀝乾水份 , 紅蘿蔔去皮切件 , 百合撕成一片片後用水沖洗及瀝乾 , 蜜棗及南北杏亦用水沖洗及瀝乾 , 果皮刮去囊撕成細塊 , 哈蜜瓜皮沖洗乾淨及瀝乾

   
 
煲內放入豬展 , 紅蘿蔔 , 蜜棗 , 南北杏及果皮 , 加入適量水用中火先煲15分鐘至滾 , 再加入哈蜜瓜皮及蟲草花拌勻用中火再煲滾後蓋上蓋轉慢火煲 1 1/2小時

加入百合繼續用慢火煲30分鐘 , 期間小心滾瀉 , 30分鐘後盛起豬展用叉撕成絲 , 放回煲內再加少許鹽調味拌勻 , 轉用中火再滾後熄火焗30分鐘即可

材料
哈蜜瓜皮1個 , 蟲草花 , 百合4個 , 豬展 , 蜜棗2粒 , 南北杏 , 果皮2塊(預先浸軟) , 紅蘿蔔1條 , 鹽



做法

1. 豬展放入煲內加水 , 用中火煮滾後盛起用水沖一沖洗及瀝乾 

2. 蟲草花浸水10分鐘後瀝乾水份 

3. 紅蘿蔔去皮切件 , 百合撕成一片片後用水沖洗及瀝乾 

4. 蜜棗及南北杏亦用水沖洗及瀝乾 , 果皮刮去囊撕成細塊 , 哈蜜瓜皮沖洗乾淨及瀝乾

5. 煲內放入豬展 , 紅蘿蔔 , 蜜棗 , 南北杏及果皮 

6. 加入適量水用中火先煲15分鐘至滾

7. 再加入哈蜜瓜皮及蟲草花拌勻用中火再煲滾後蓋上蓋轉慢火煲 1 1/2小時

8. 加入百合繼續用慢火煲30分鐘 , 期間小心滾瀉 

9. 30分鐘後盛起豬展用叉撕成絲 , 放回煲內再加少許鹽調味拌勻 

10. 轉用中火再滾後熄火焗30分鐘即可 

又來多湯渣的湯水 , 唔知用水果皮煲出黎的甜湯大家又喜唔喜歡呢 ^^