三文魚頭豆漿湯

廚房永遠都有包黃豆 , 方便我得閒的時候可以整豆漿 , 唔知大家有冇試過用豆漿煲湯 , 或者用來做火鍋湯底呢 ??? 如果大家冇試過 , 袁太一定要推介呢個湯俾大家 ......

先用黃豆整成無糖豆漿 , 配上三文魚頭 , 娃娃菜同腐竹煮成湯底 , 湯頭有魚的香味 , 仲散發陣陣的豆香味 , 連平時唔多鐘意飲豆漿或怕魚湯腥味重的袁生都大讚好味 , 而我就最鐘意食魚頭 , 呢個魚頭我可以慢慢食 , 慢慢嘆 , 絕對冇人同我爭(皆因袁生唔太愛食魚)



而呢款湯袁太亦試過用來做火鍋湯底 , 以往火鍋湯底只會用冬陰功或沙爹湯底的袁生袁太 , 呢款豆漿湯味道比較清 , 感覺會冇咁燥熱呢 ^^



材料 : 三文魚頭 , 娃娃菜 , 炸枝竹 , 薑 , 芫茜 , 無糖豆漿 , 熱水 , 鹽 , 胡椒粉

三文魚頭用水沖洗兩面至乾淨 , 抹乾水份後放入大碗內 , 加少許鹽及胡椒粉拌勻靜待30分鐘 , 期間將芫茜莖切段 , 薑去皮切片 , 芫茜莖用水沖一沖洗及瀝乾

將薑片放入鑊中爆香 , 加入三文魚頭用中火煎至兩面金黃色 , 加入適量熱水蓋上蓋用中火煮20分鐘成奶白色湯 , 將魚頭及湯逐一放入煲內 , 用中火煮滾後蓋上蓋煲1 1/2小時 , 期間將娃娃菜洗淨切半 , 腐竹切細段後用水沖一沖洗及瀝乾

1 1/2小時後加入娃娃菜 , 再蓋上蓋繼續用慢火煲20分鐘 , 加入腐竹 , 芫茜莖拌勻蓋上蓋轉中火煲多10分鐘 , 最後加入無糖豆漿及少許鹽拌勻調味用中火煮至滾 , 熄火焗30分鐘即可 

 
材料
三文魚頭1個 , 娃娃菜3棵 , 炸枝竹 , 薑 , 芫茜1扎 , 無糖豆漿300ml , 熱水 , 鹽 , 胡椒粉

做法

1. 三文魚頭用水沖洗兩面至乾淨 

2. 抹乾水份後放入大碗內 , 加少許鹽及胡椒粉拌勻靜待30分鐘 

3. 期間將芫茜莖切段 , 薑去皮切片 , 芫茜莖用水沖一沖洗及瀝乾

4. 將薑片放入鑊中爆香 , 加入三文魚頭用中火煎至兩面金黃色 

5. 加入適量熱水蓋上蓋用中火煮20分鐘成奶白色湯 

6. 將魚頭及湯逐一放入煲內 , 用中火煮滾後蓋上蓋煲1 1/2小時 

7. 期間將娃娃菜洗淨切半 , 炸枝竹切細段後用水沖一沖洗及瀝乾

8. 1 1/2小時後加入娃娃菜 , 再蓋上蓋繼續用慢火煲20分鐘 

9. 加入炸枝竹 , 芫茜莖拌勻蓋上蓋轉中火煲多10分鐘

10. 最後加入無糖豆漿及少許鹽拌勻調味用中火煮至滾 , 熄火焗30分鐘即可 




用豆漿煲的湯水 , 除飲湯食湯渣外 , 用來做火鍋湯底都一樣正斗 , 而且有我最愛的三文魚頭 , 好滿足呢 ^^