粟米海底椰片柿餅排骨湯

每逢夏天 , 我一定會煲好多 ... 好多的消暑湯水或者滋潤湯水 , 真係煲湯多到可以當正餐 , 有時可以食湯渣飲湯水就當一餐 , 都會非常飽肚 ......



最近見袁生有幾聲咳 , 又話熱氣 , 又話口乾乾咁 , 所以今次想煲番d止咳滋潤的湯水俾袁生飲 , 第一時間想起~柿餅~ , 係街市好幸運地見到有得賣 , 就買了幾塊回家

我知用柿餅煲湯有止咳功效 , 不過又驚袁生唔太鐘意個味道 , 所以保守少少 , 煲湯料除左有柿餅外 , 配上粟米 , 紅蘿蔔 , 海底椰片同排骨煲 , 味道甜甜潤潤 , 袁太好喜歡個味道 , 而袁生都喜愛 , 飲完喉嚨會變得舒服 , 希望袁生飲完真係可以止到咳呢 ^^

材料 : 柿餅 , 排骨 , 粟米 , 紅蘿蔔 , 海底椰片 , 果皮(預先浸軟) , 蜜棗 , 鹽

排骨放入煲內 , 加水用中火煮滾後用水沖一沖洗再瀝乾 , 紅蘿蔔去皮切件 , 粟米切段 , 海底椰片及蜜棗用水沖洗及瀝乾 , 果皮刮去囊撕成細片 , 柿餅用水洗淨去蒂切件

煲內逐一放入排骨 , 粟米 , 紅蘿蔔 , 柿餅 , 蜜棗及果皮 , 加入適量水煲滾 , 加入海底椰片拌勻用中火煲15分鐘 , 蓋上蓋轉慢火煲1 1/2小時 , 最後加少許鹽調味拌勻 , 轉用中火再煲滾後熄火焗30分鐘即可

材料
柿餅3個 , 排骨 , 粟米1條 , 紅蘿蔔1條 , 海底椰片 , 果皮2塊(預先浸軟) , 蜜棗2粒 , 鹽



做法

1. 排骨放入煲內 , 加水用中火煮滾後用水沖一沖洗再瀝乾 

2. 紅蘿蔔去皮切件 , 粟米切段 

3. 海底椰片及蜜棗用水沖洗及瀝乾 , 果皮刮去囊撕成細片 

4. 柿餅用水洗淨去蒂切件

5. 煲內逐一放入排骨 , 粟米 , 紅蘿蔔 , 柿餅 , 蜜棗及果皮 , 加入適量水煲滾 

6. 加入海底椰片拌勻用中火煲15分鐘 , 蓋上蓋轉慢火煲1 1/2小時 

7. 最後加少許鹽調味拌勻 , 轉用中火再煲滾後熄火焗30分鐘即可

第一次用柿餅煲湯就愛上了 , 煲出來味道甜甜 , 我喜愛呢 ^^