紅燒牛肉麵

前幾日去街市買餸的時候發現急凍店的牛展幾靚仔 , 所以就買左一條放係冰箱冷藏 , 預防又想煮牛展的時候又買不到靚牛展 , 平時我多數會用牛展煮咖哩 , 又或者用來做清燉牛肉湯 , 不過今次就用牛展製作袁生最喜愛的食物 , 就係紅燒牛肉麵 ......



麻煩友好鬼鐘意食牛肉麵 , 每次去台式餐廳食飯佢都指定叫紅燒牛肉麵 , 但一碗好味的牛肉麵唔係間間都做得好味 , 大部份的餐廳都例牌麵少少 , 牛肉又得個dd , 而且牛肉切到好碎 , 同價錢完全唔夾 , 好唔化算 , 其實一碗靚的牛肉麵除左牛肉要"淋"身外 , 湯底的味道都好重要 , 用最簡單的材料煮出一煲靚湯底其實唔難 , 再加上牛展一齊煲 , 煲佢粒幾兩粒鐘就完成 , 而且牛肉麵唔一定要用牛展 , 可以轉用牛腩都冇問題



另外加上關廟麵 , 幾條小棠菜 , 淋上湯汁 , 放入甘旬及牛展就大功告成 , 呢個做法煲出黎的湯底味道濃郁 , 又帶少許辣味 , 麵條索晒湯汁 , 最重要牛展好淋身 , 好入味 , 事問如果出街食 , 會唔會有咁多塊牛展俾妳呢 ???



袁生對呢碗牛肉麵讚不絕口 , 話絕對好味過出面的餐廳呢 ^^



材料 : 急凍牛展 , 小棠菜 , 洋蔥 , 蕃茄 , 甘旬 , 豆簽麵(關廟麵) , 滷水料 , 魚袋 , 蔥 , 薑 , 冰糖 , 辣豆瓣醬 , 水

蔥切粒及切段 , 薑去皮切片 , 滷水料放入魚袋內索緊 , 將薑片及蔥段放入水中 , 加入牛展蓋上蓋用中火出水5分鐘 , 盛起牛展沖一沖洗及瀝乾

甘旬去皮 , 洋蔥去衣 , 蕃茄洗淨 , 全部切件 , 煲內加入少許油燒熱 , 放入洋蔥 , 蕃茄 , 甘旬炒香 , 加入牛展 , 滷水包 , 冰糖及調味料拌勻炒數分鐘 , 加水至蓋過所有材料 , 拌一拌勻後先用中火煮15分鐘至滾 , 蓋上蓋轉慢火煲1 1/2小時 , 再熄火焗15分鐘

將牛展盛起待涼切厚片 , 甘旬亦盛起 , 一同放入大碗內 , 湯底的渣用隔篩隔去 , 將甘旬牛展及湯汁倒回煲內 , 拌一拌勻後蓋上蓋焗1小時至牛展上色入味 , 期間將小棠菜加少許鹽洗淨 , 沖一沖洗及瀝乾

豆簽麵放入煲內 , 加水用慢火拌勻煮至軟身先放上碟或碗內 , 小棠菜放入煲內加少許鹽 , 用中火煮至軟身 , 將大煲內的甘旬牛展湯底用中火再煮滾 , 麵上逐一放入小棠菜 , 牛展及甘旬 , 再淋上湯汁 , 最後灑上蔥粒即可

材料
急凍牛展2條 , 小棠菜1/2斤 , 洋蔥1個 , 蕃茄3個 , 甘旬1條 , 豆簽麵(關廟麵) , 滷水料1包 , 魚袋1個 , 蔥 , 薑 , 冰糖 , 辣豆瓣醬 , 水

調味料
辣豆瓣醬2湯匙 , 老抽



做法
1. 蔥切粒及切段 , 薑去皮切片 , 滷水料放入魚袋內索緊 

2. 將薑片及蔥段放入水中 , 加入牛展蓋上蓋用中火出水5分鐘 

3. 盛起牛展沖一沖洗及瀝乾 

4. 甘旬去皮 , 洋蔥去衣 , 蕃茄洗淨 , 全部切件 

5. 煲內加入少許油燒熱 , 放入洋蔥 , 蕃茄 , 甘旬炒香 

6. 加入牛展 , 滷水包 , 冰糖及調味料拌勻炒數分鐘 , 加水至蓋過所有材料 

7. 拌一拌勻後先用中火煮15分鐘至滾 , 蓋上蓋轉慢火煲1 1/2小時 

8. 再熄火焗15分鐘

9. 將牛展盛起待涼切厚片 , 甘旬亦盛起 , 一同放入大碗內 , 湯底的渣用隔篩隔去 

10. 將甘旬牛展及湯汁倒回煲內 , 拌一拌勻後蓋上蓋焗1小時至牛展上色入味 

11. 期間將小棠菜加少許鹽洗淨 , 沖一沖洗及瀝乾 

12. 豆簽麵放入煲內 , 加水用慢火拌勻煮至軟身先放上碟或碗內 

13. 小棠菜放入煲內加少許鹽 , 用中火煮至軟身 

14.  將大煲內的甘旬牛展湯底用中火再煮滾 

15. 麵上逐一放入小棠菜 , 牛展及甘旬 , 再淋上湯汁 , 最後灑上蔥粒即可
  



湯底濃郁又帶少許微辣 , 牛展亦好淋身 , 自家製的牛肉麵絕對唔會輸蝕俾出面的餐廳呢 ^^