蘋果紅蘿蔔粟米雪耳豬骨湯

袁太呢個星期好勤力 , 絕無偷懶 , 幾乎日日都有煮飯仔 , 煲下湯咁 , 不過最近身體感覺有少許唔舒服 , 條腰又開始赤赤痛  , 真係要臥床多多休息先得 ......



呢幾日天氣簡直好到爆 , 不過天氣熱 , 我就唔想留係廚房煮兩餸一湯咁辛苦 , 最近的晚餐唔係炒飯就只係簡單煲個湯 , 飲湯食湯渣當一餐 , 每逢夏天我都鐘意用生果煮餸或煲湯



今次就選擇用蘋果 , 係用來煲湯的 , 配上煲湯的最佳組合 , 粟米+紅蘿蔔 , 煲出來清清甜甜 , 起初想用豬展湯 , 之但係經過豬肉檔俾我見到一份份的豬骨賣 , 我以往好鐘意用呢款豬骨煲 , 煲出來雖然比較多油份 , 但勝在味道香濃 , 有時上網或睇電視 , 大多數人都比較鐘意用淺色皮的蘋果 , 但袁太就剛剛相反 , 比較鐘意用深色的蘋果 , 感覺煲出來的湯水味道會清甜得多呢 ^^

材料 : 蘋果 , 粟米 , 紅蘿蔔 , 雪耳 , 豬骨 , 蜜棗 , 鹽 

豬骨放入水煲內 , 加水用中火煮滾 , 再盛起用水沖洗去油份及碎骨 , 瀝乾備用 , 粟米切段 , 紅蘿蔔去皮切件 , 雪耳浸水待軟 , 蘋果洗淨去芯連皮切件 , 加少許鹽用水沖一沖洗及瀝乾

  
煲內逐一放入豬骨 , 粟米 , 紅蘿蔔 , 蘋果及蜜棗 , 加入適量水 , 先用中火煲15分鐘至滾起 , 15分鐘後拌一拌勻湯內材料 , 再蓋上蓋轉慢火煲 1 1/2小時 , 期間將浸軟的雪耳撕成細塊 , 用水沖一沖洗及瀝乾

煲1 1/2小時後將蘋果盛起去皮 , 將蘋果肉壓成蓉後放回煲內 , 再加入雪耳拌勻 , 蓋上蓋繼續用慢火煲15分鐘 , 最後加少許鹽拌勻調味轉用大火煲滾 , 熄火蓋上蓋焗30分鐘即可

材料
蘋果3個 , 粟米1條 , 紅蘿蔔1條 , 雪耳2個 , 豬骨 , 蜜棗3粒 , 鹽



做法

1. 豬骨放入水煲內 , 加水用中火煮滾 , 再盛起用水沖洗去油份及碎骨 

2. 瀝乾備用 

3. 粟米切段 , 紅蘿蔔去皮切件 

4. 雪耳浸水待軟 , 蘋果洗淨去芯連皮切件 , 加少許鹽用水沖一沖洗及瀝乾

5. 煲內逐一放入豬骨 , 粟米 , 紅蘿蔔 , 蘋果及蜜棗 , 加入適量水

6. 先用中火煲15分鐘至滾起 

7. 15分鐘後拌一拌勻湯內材料 , 再蓋上蓋轉慢火煲 1 1/2小時
 

8. 期間將浸軟的雪耳撕成細塊 , 用水沖一沖洗及瀝乾

9. 煲1 1/2小時後將蘋果盛起去皮 , 將蘋果肉壓成蓉後放回煲內 , 再加入雪耳拌勻 

10. 蓋上蓋繼續用慢火煲15分鐘 

11. 最後加少許鹽拌勻調味轉用大火煲滾 , 熄火蓋上蓋焗30分鐘即可 




用豬骨煲的肉湯 , 係袁太最愛的肉湯系列之一呢 ^^