椰汁黑糯米飯 ... 糰

咁多位~中秋節快樂~ , 大家今日會有咩節目呢 ??? 袁生袁太約左隔離屋的小朋友落樓下公園玩燈籠 , 希望唔好落雨 , 之前係雜貨店買左包黑糯米 , 用黎整左一次糖水之後就放左係度冇再理佢 , 最近就突然想起一道甜品 , 就係"椰汁黑糯米飯" ......



呢款甜品袁太咁大個女只係食過一次咁大把 , 仲要係d東南亞餐廳買的 , 印象中好鬼甜 , 咁甜的甜品 , 對袁生袁太來說 , 一向都唔太受歡迎 , 不過隨年齡漸漸大 , 有時都好想食d甜的野平衡番個身體 , 不過自己動手做就可以整得冇出面街咁甜姐姐 , 但呢款甜品唔甜又唔好食喎 ,哎呀 ~~~ 好矛盾



曾經上網search過有人會用飯煲整淋糯米飯 , 亦有人會用隔水蒸的方法 , 袁太今次就試用蒸的方法 , 簡單地用電鍋蒸淋d糯米 , 再加椰汁拌勻再蒸 , 等糯米飯可以完完全全吸引晒椰汁的香味 , 稍為待涼就食得 , 最傳統當然係配埋芒果一齊食 , 不過袁太買唔到芒果 , 所以就用椰糖整個汁料 , 再淋在黑糯米飯上 , 黑糯米煙煙韌韌 , 又有香噴噴的椰香味 ,當飯後甜品絕對一流 , 不過黑糯米都幾飽肚 , 食完晚飯要等幾粒鐘先食得落呢 ^^



材料 : 黑糯米 , 椰漿 , 椰糖粉(東南亞店買 , 如果冇椰糖 , 可用紅糖代替) , 鹽 , 白砂糖 , 斑蘭葉

將黑糯米加水浸過面靜待一晚 , 翌日將黑糯米用水沖一沖洗及瀝乾水份 , 將黑糯米放入碟內 , 放入電蒸鍋蓋上蓋先蒸30分鐘

蒸黑糯米期間將200ml份量的椰漿倒入煲內 , 加入白砂糖及少許鹽 , 再放入斑蘭葉 , 用慢火慢慢拌勻煮至出煙微滾 , 盛起斑蘭葉去掉 , 將椰汁盛起備用 , 黑糯米蒸30分鐘後放入大碗內 , 加入之前煮好的椰汁拌勻 , 見黑糯米差不多吸收椰汁的味道後 , 再放入碟內 , 再入電蒸鍋蓋上蓋蒸10分鐘再焗30分鐘

將餘下65ml椰汁放入煲內 , 加入椰糖及少許鹽 , 用慢火慢慢拌勻煮至椰糖溶掉熄火 , 將焗好的黑糯米飯取出待涼10分鐘 , 將黑糯米搓成飯糰形狀後放上碟 ,  淋上椰糖汁即可 

材料
黑糯米300g , 椰漿265ml , 椰糖粉2湯匙(東南亞店買 , 如果冇椰糖 , 可用紅糖代替) , 鹽 , 白砂糖20g , 斑蘭葉2片



做法
1. 將黑糯米加水浸過面靜待一晚 

2. 翌日將黑糯米用水沖一沖洗及瀝乾水份 

3. 將黑糯米放入碟內 , 放入電蒸鍋蓋上蓋先蒸30分鐘 

4. 蒸黑糯米期間將200ml份量的椰漿倒入煲內 

5. 加入白砂糖及少許鹽 , 再放入斑蘭葉 , 用慢火慢慢拌勻煮至出煙微滾 

6. 盛起斑蘭葉去掉 , 將椰汁盛起備用

7. 黑糯米蒸30分鐘後放入大碗內 , 加入之前煮好的椰汁拌勻 

8. 見黑糯米差不多吸收椰汁的味道後 , 再放入碟內 

9. 再入電蒸鍋蓋上蓋蒸10分鐘再焗30分鐘

10. 將餘下65ml椰汁放入煲內 , 加入椰糖及少許鹽 , 用慢火慢慢拌勻煮至椰糖溶掉熄火 

11. 將焗好的黑糯米飯取出待涼10分鐘

12. 將黑糯米搓成飯糰形狀後放上碟 ,  淋上椰糖汁即可

 



椰汁黑糯米飯雖然味道偏甜 , 但袁太就係喜歡呢個味道 , 直頭愛上左呢款甜品呢 ^^