黑糯米蓮子紅豆沙

之前係雜貨店買了一包黑糯米回家 , 除左之前整左椰汁黑糯米飯糰之後 , 都冇再用過 , 我亦知黑糯米可以有好多煮法 , 究竟今次煲椰汁紫米露 ??? 黑糯米西米芋頭糖水還是怎樣好呢 ??? 不過我知袁生唔太愛食芋頭 , 所以out左芋頭糖水 , 椰汁我又麻麻地 , 我比較喜愛濃味的糖水多D , 咁倒不如黑糯米配紅豆 , 味道應該夠濃又飽肚 , 何況紅豆沙係我最愛的中式糖水之一 ......



而剛巧地住係袁太隔離單位的太太(欣姐姐)俾左家鄉的新會陳皮我 , 而奶奶前星期番大陸玩的時候又俾左蓮子我 , 既然有陳皮又有蓮子 , 都唔煲紅豆沙都唔得喇



黑糯米同紅豆的份量可以自由配搭 , 如果大家喜愛黑糯米味重的 , 咪黑糯米份量多過紅豆囉 , 但如果大家好似我咁想紅豆味重d , 就紅豆份量多過黑糯米喇 , 再加埋果皮一齊煲 , 味道好夾 , 呢款糖水食唔晒仲可以放入雪櫃凍食 , 所以袁太都煲左一大煲 , 煲好的時候食熱的 , 其餘放入雪櫃留待下次食 , 黑糯米有咬口 , 紅豆又起沙 , 雖然好味 , 不過食兩碗都頂晒胃呢 ^^



材料 : 黑糯米 , 紅豆(預先浸一晚) , 果皮(預先浸軟) , 蓮子 , 冰糖 , 水

將浸好的紅豆用水沖一沖洗及瀝乾 , 黑糯米亦用水沖一沖洗及瀝乾 , 果皮刮去囊撕成細片 

將紅豆放入煲內加入約50ml水拌炒紅豆數分鐘至收乾水份 , 再加入第二次水(同是50ml) , 繼續用中火炒至水份收乾 , 再放入黑糯米 , 果皮及適量水拌勻 , 先用中火煲15分鐘 , 去掉面上泡泡 , 蓋上蓋轉慢火煲1小時至黑糯米及紅豆腍身 , 期間小心滾瀉

期間將蓮子加水浸過面靜待30分鐘 , 再用水沖一沖洗及瀝乾

1小時後將已煲至腍身的紅豆盛起(只盛起1/3份量就可以) , 用匙將紅豆壓成蓉 , 再放回煲內 , 再加入蓮子拌勻蓋上蓋繼續用慢火煲30分鐘 , 最後加入冰糖拌勻轉用中火煮至溶 , 熄火焗30分鐘即可

材料
黑糯米3湯匙 , 紅豆(預先浸一晚)300g , 果皮2塊(預先浸軟) , 蓮子 , 冰糖 , 水



做法
1. 將浸好的紅豆用水沖一沖洗及瀝乾 , 黑糯米亦用水沖一沖洗及瀝乾 

2. 果皮刮去囊撕成細片 

3. 將紅豆放入煲內加入約50ml水拌炒紅豆數分鐘至收乾水份 

4. 再加入第二次水(同是50ml) , 繼續用中火炒至水份收乾 

5. 再放入黑糯米 , 果皮及適量水拌勻 

6. 先用中火煲15分鐘 , 去掉面上泡泡 , 蓋上蓋轉慢火煲1小時至黑糯米及紅豆腍身 

7. 期間小心滾瀉 

8. 期間將蓮子加水浸過面靜待30分鐘 , 再用水沖一沖洗及瀝乾

9. 1小時後將已煲至腍身的紅豆盛起(只盛起1/3份量就可以) , 用匙將紅豆壓成蓉 

10. 再放回煲內 , 再加入蓮子拌勻蓋上蓋繼續用慢火煲30分鐘 

11. 最後加入冰糖拌勻轉用中火煮至溶 , 熄火焗30分鐘即可 
 



咁有益同美味的糖水 , 唔知大家有冇興趣來一碗呢 ^^