五香肉丁餐肉腸仔炒飯

懶人又來煮懶人餐 , 何謂懶人餐 ??? 對我來說 , 只是唔需要專登去買材料 , 又或者用廚房剩餘的物資 , 就可以煮到一餐飯出來 , 這就是袁太所謂的懶人餐了 , 哈 ......



其實講咁多廢話 , 都離不開一個字"懶" , 一來最近因為腰痛的關係 , 晚餐多數都係一碟過 , 離不開都係炒飯 , 炒麵 , 湯飯 , 湯餃 , 好耐冇煮兩餸的晚餐呢 , 二來唔想用腦汁去思考究竟煮什麼好 , 所以求求其其有野落肚就算 , 袁太話大家知 , 呢個炒飯的材料全部都係廚房的剩餘物資黎架 , 絕對唔駛落街買材料



不過大家都知 , 我家袁生一向都唔太喜愛炒飯 , 但今次異想沒有抗拒 , 可能因為有他喜愛的食物做材料 , 呢個就係"五香肉丁+腸仔 "做主打的炒飯 , 再加上百寶箱找到的雞蛋 , 雜豆及芥蘭做副材料 , 另外再加上新鮮白飯 , 兒時聽媽咪話 , 炒飯用冷飯先會好味 , 但我又唔係咁覺得喎 , 我有時訓醒突然想食炒飯 , 都會即刻煮新鮮飯來炒 , 都可以炒到乾身好味



呢個炒飯製作時間唔長 , 而且炒飯裡有菜又有肉 , 不過大家都知肉丁本身有少許辣 , 雖然用來炒飯係好香好香 , 不過食完會唔會又變得燥熱或熱氣呢 ^^



材料 : 五香肉丁(細) , 芥蘭 , 雞蛋 , 廚師牌腸仔 , 午餐肉 , 雜豆 , 冷飯 , 薑 , 胡椒粉 , 鹽 , 魚露

芥蘭加少許鹽加水浸過面靜待10分鐘 , 期間將兩隻雞蛋拌勻成蛋液 , 芥蘭浸10分鐘後用水沖洗乾淨 , 將莖切粒及葉處理好 , 芥蘭莖及芥蘭葉放入煲內加水用中火煮至滾 , 盛起瀝乾水份將芥蘭葉切碎

腸仔切粒 , 薑去皮切粒 , 午餐肉切粒 , 雜豆用水沖一沖洗及瀝乾 , 將蛋液放入鑊中炒至至熟 , 加入冷飯 , 少許鹽調味拌勻炒冷飯至散 , 先盛起備用

  
先將午餐肉粒及腸仔粒落鑊爆香盛起 , 原鑊中加入薑粒及芥蘭莖拌勻爆香 , 加入雜豆 , 炒飯 , 少許魚露及胡椒粉調味 , 拌勻用中火炒數分鐘 , 午餐肉粒及腸仔粒回鑊 , 加入芥蘭葉 , 五香肉丁再拌勻炒片刻即可

材料 
五香肉丁(細)1罐 , 芥蘭1/2斤 , 雞蛋2隻 , 廚師牌腸仔6條 , 午餐肉1罐 , 雜豆 , 冷飯3碗 , 薑 , 胡椒粉 , 鹽 , 魚露



做法
1. 芥蘭加少許鹽加水浸過面靜待10分鐘 , 期間將兩隻雞蛋拌勻成蛋液 

2. 芥蘭浸10分鐘後用水沖洗乾淨 

3. 將莖切粒及葉處理好 , 芥蘭莖及芥蘭葉放入煲內加水用中火煮至滾 

4. 盛起瀝乾水份將芥蘭葉切碎

5. 腸仔切粒 , 薑去皮切粒 , 午餐肉切粒 , 雜豆用水沖一沖洗及瀝乾 

6. 將蛋液放入鑊中炒至至熟 

7. 加入冷飯 , 少許鹽調味拌勻炒冷飯至散 , 先盛起備用

8. 先將午餐肉粒及腸仔粒落鑊爆香盛起 

9. 原鑊中加入薑粒及芥蘭莖拌勻爆香 , 加入雜豆 , 炒飯 , 少許魚露及胡椒粉調味

10. 拌勻用中火炒數分鐘 

11. 午餐肉粒及腸仔粒回鑊 , 加入芥蘭葉 , 五香肉丁再拌勻炒片刻即可 




只用廚房的剩餘物資都可以做出一碟色香味俱全的炒飯 , 我唔客氣呢 ^^