蜜瓜雪耳海底椰豬骨湯

每逢夏天或秋涼的季節 , 我往往都會煲一些滋潤的湯水潤一潤 , 最愛用生果做主打的我 , 已厭倦用蘋果 , 雪梨 , 木瓜煲的湯水 , 今次選擇的煲湯生果 , 係佢 ~蜜瓜~ 大家都知袁生係一位超級 ... 超級麻煩友 ,  蜜瓜係佢愛吃的生果 , 用來煲湯一定唔會投訴 , 而且愛飲湯食湯渣的袁氏夫婦 , 用蜜瓜煲湯可以食埋d瓜肉 , 一定清甜美味 ......



袁太上網search過好多太太媽媽們 , 煲蜜瓜湯都喜愛配螺頭 , 其實我N年前都用 , 螺頭煲過 , 不過袁生好似唔太接受個味道 , 所以今次就用簡單的材料去配上蜜瓜 , 簡單的材料都係經常用來煲湯的基本野 , 有紅蘿蔔 , 海底椰片 , 豬骨頭同雪耳



大家見到有雪耳都感覺到湯水會好滋潤呢 , 閒時喜愛去雜貨店買一大包雪耳回家 ,用來煮餸 , 煲湯 , 煮糖水樣樣得 , 而且蜜瓜煲到半溶的狀態 , 食時甜甜的 , 煲佢差不多三粒鐘 , 又係一碗多湯渣的湯水 , 有蜜瓜 , 又有紅蘿蔔 , 豬骨可以食 , 又可以偷懶唔駛煮飯呢 ^^

材料 : 蜜瓜 , 紅蘿蔔 , 雪耳 , 豬骨 , 海底椰片 , 果皮(預先浸軟) , 鹽 , 蜜棗 , 南北杏

豬骨用水沖一沖洗放入煲內 , 加水用中火煮滾 , 盛起豬骨用水沖一沖洗碎骨及瀝乾 , 雪耳浸水待軟身 , 紅蘿蔔去皮切件 , 海底椰片用水沖一沖洗及瀝乾 , 果皮刮去囊撕成細片 , 蜜瓜去籽連皮切大件 

 
煲內逐一放入豬骨 , 紅蘿蔔 , 海底椰片 , 南北杏 , 蜜棗及果皮 , 加入適量水用中火煲至微滾 , 加入蜜瓜拌勻再用中火繼續煲15分鐘至滾 , 蓋上蓋轉慢火煲1 1/2小時 , 期間將浸至軟身的雪耳撕成細塊 , 用水沖一沖洗及瀝乾

1 1/2小時後加入雪耳 , 少許鹽調味拌勻 , 轉用中火煲多15分鐘 , 熄火焗30分鐘即可

材料
蜜瓜1/2個 , 紅蘿蔔1條 , 雪耳1個 , 豬骨 , 海底椰片 , 果皮2塊(預先浸軟) , 鹽 , 蜜棗2粒 , 南北杏



做法

1. 豬骨用水沖一沖洗放入煲內 , 加水用中火煮滾 , 盛起豬骨用水沖一沖洗碎骨及瀝乾 

2. 雪耳浸水待軟身 , 紅蘿蔔去皮切件 

3. 海底椰片用水沖一沖洗及瀝乾 , 果皮刮去囊撕成細片 

4. 蜜瓜去籽連皮切大件  

5. 煲內逐一放入豬骨 , 紅蘿蔔 , 海底椰片 , 南北杏 , 蜜棗及果皮 

6. 加入適量水用中火煲至微滾 

7. 加入蜜瓜拌勻再用中火繼續煲15分鐘至滾 , 蓋上蓋轉慢火煲1 1/2小時 

8. 期間將浸至軟身的雪耳撕成細塊 , 用水沖一沖洗及瀝乾 

9. 1 1/2小時後加入雪耳 , 少許鹽調味拌勻 , 轉用中火煲多15分鐘 

10. 熄火焗30分鐘即可 

又一碗既滋潤又多湯渣的湯水 , 食完湯渣飲埋湯都飽晒 , 之前袁太仲留起左少少蜜瓜俾袁生做飯後果呢 ^^