涼瓜魚肉煎蛋角

袁太一向都好愛吃涼瓜 , 無論煲湯 , 炆豬手 , 炒牛肉我統統都愛 , 不過用來煎蛋角我就大愛 ... 愛 ... 愛 ...



最愛係涼瓜菜甫煎蛋 , 蛋要煎到金金黃黃燶邊 , 脆脆口 , 經常同袁生爭邊位食 , 不過最近袁生唔多喜愛食菜甫 , 可以話唔知咩原因突然好討厭菜甫 , 睇怕菜甫要打入冷宮了 , 咁唯有轉一轉材料



蝦還是鯪魚肉好 ??? 袁生選擇了鯪魚肉 , 配合涼瓜一齊做餡料 , 味道應該唔會差 , 將雞蛋煎成蛋角型 , 一個個金金黃黃脹卜卜的蛋角 , 再加一碗白飯 , 滿足呢 ^^  



材料 : 涼瓜 , 鯪魚肉 , 雞蛋 , 蔥粒 , 麻油 , 胡椒粉 , 鹽 , 生粉

涼瓜切半去襄切成細薄片 , 放入大碗中加少許鹽拌勻靜待30分鐘 , 30分鐘後用水沖一沖洗涼瓜片及瀝乾水份 , 加入熱水後再渣乾水份備用

雞蛋打入碗中 , 加少許麻油及胡椒粉調味拌勻打成蛋液 , 加入涼瓜片及加1茶匙生粉拌勻 , 再加入魚肉 , 蔥粒拌勻靜待10分鐘 , 燒紅鑊 , 將適量的蛋液放入鑊中煎至半凝固 , 再用鑊鏟將蛋液對摺成蛋角型 , 慢慢煎至兩面金黃色即可

 
材料
涼瓜1條 , 鯪魚肉$10 , 雞蛋6隻 , 蔥粒 , 麻油 , 胡椒粉 , 鹽 , 生粉



做法
1. 涼瓜切半去襄切成細薄片 , 放入大碗中加少許鹽拌勻靜待30分鐘 

2. 30分鐘後用水沖一沖洗涼瓜片及瀝乾水份 , 加入熱水後再渣乾水份備用 

3. 雞蛋打入碗中 , 加少許麻油及胡椒粉調味拌勻打成蛋液 

4. 加入涼瓜片及加1茶匙生粉拌勻 

5. 再加入魚肉 , 蔥粒拌勻靜待10分鐘 

6. 燒紅鑊 , 將適量的蛋液放入鑊中煎至半凝固 , 再用鑊鏟將蛋液對摺成蛋角型 

7. 慢慢煎至兩面金黃色即可 




呢個煎蛋角煎到金金黃黃 , 真想快快咬一啖呢 ......