紅棗蕃薯雪耳西米糖水

2017年最後一篇文章喇 , 時間過得真快 , 話咁快今晚就要送走2017 , 迎接2018年喇 , 袁太希望大家忘記2017唔開心的事 , 帶著開心及微笑迎接2018年 , 前幾日袁太係街市買到靚靚的橙心蕃薯 , 第一時間又想煲糖水 , 不過今次唔想咁只加薑絲同片糖 , 想再加多多材料煲 , 係雪櫃俾我搵到雪耳同西米 , 係喇 , 係妳地喇 , 用埋佢黎煲糖水就最啱 ......



其實每次整蕃薯糖水都好簡單 , 今次比較麻煩係煮西米 , 成日覺得煮西米好煩 , 又要放入煲煮 , 煮完又要沖走d雜質 , 又要浸冰水 , 浸完又要瀝乾水份 , 咁d西米先用得 , 好鬼煩呢 , 不過我平時又喜愛食西米喎 , 咩西米糕 , 西米布甸我都好鐘意 , 係咪好犯賤呢 , 呢款糖水雖然加左西米同雪耳 , 不過煮蕃薯糖水就一定唔少得薑 , 又要多多薑絲先得 , 有時袁生仲話我 , 煮糖水駛唔駛咁多薑呀 , 整到薑味咁重 , 好搶喉呀 , 我都費時理佢咁多 , 總知我煮蕃薯糖水一定要勁重薑味先得 , 你唔鐘意可以唔食 , 冇人迫你食喎 , 佢最後當然係唔再出聲 , 乖乖食幾碗落肚



每次煲蕃薯糖水 , 糖水顏色金金黃黃 , 賣相靚靚 , 又有我至愛的材料 , 又有薑味重得黎甜甜地的片糖水 , 又飽肚 , 又暖胃 , 又滿足呢 ^^



材料 : 橙心蕃薯 , 薑 , 雪耳 , 紅棗 , 西米 , 片糖 , 水

西米放入煲內 , 加入水蓋過面 , 用中火煮滾後拌一拌勻西米以免黏底 , 用慢火煮至西米成半透明狀態 , 將西米隔水倒在隔篩內 , 用水沖洗雜質後加冰水浸過面靜待10分鐘 , 再瀝乾水份 , 薑去皮切絲 , 紅棗去核 , 雪耳浸水至軟身後撕成細塊 , 用水沖一沖洗及瀝乾

 

 
煲內先放入薑絲 , 紅棗及雪耳 , 加入3000ml水拌勻 , 用中火煮滾 , 再蓋上蓋繼續用中火煲10分鐘 , 期間小心滾瀉

蕃薯去皮切件 , 蕃薯放入大碗內加水浸過面靜待10分鐘 , 倒去水份後用水沖一沖洗及瀝乾

10分鐘後加入蕃薯拌勻再煮滾 , 再蓋上蓋轉慢火煲15分鐘 , 最後加入西米及片糖轉用中火煮至溶 , 熄火焗30分鐘即可

材料
橙心蕃薯4個 , 薑 , 雪耳1個 , 紅棗5粒 , 西米 , 片糖2磚 , 水3000ml



做法
1. 西米放入煲內 , 加入水蓋過面 , 用中火煮滾後拌一拌勻西米以免黏底 

2. 用慢火煮至西米成半透明狀態 

3. 將西米隔水倒在隔篩內 , 用水沖洗雜質後加冰水浸過面靜待10分鐘 

4. 再瀝乾水份 

5. 薑去皮切絲 , 紅棗去核 , 雪耳浸水至軟身後撕成細塊 , 用水沖一沖洗及瀝乾

6. 煲內先放入薑絲 , 紅棗及雪耳 , 加入3000ml水拌勻 

7. 用中火煮滾 , 再蓋上蓋繼續用中火煲10分鐘 

8. 期間小心滾瀉

9. 蕃薯去皮切件 , 蕃薯放入大碗內加水浸過面靜待10分鐘 

10. 倒去水份後用水沖一沖洗及瀝乾

11. 10分鐘後加入蕃薯拌勻再煮滾 , 再蓋上蓋轉慢火煲15分鐘 

12. 最後加入西米及片糖轉用中火煮至溶 , 熄火焗30分鐘即可 




又係一道金金黃黃的蕃薯糖水 , 又有雪耳 , 甜甜潤潤 , 令我食完一碗再一碗呢 ^^