麥樂雞

麥樂雞~~我相信有好多朋友仔都鐘意食 , 我同袁生都唔例外 , 平均每兩星期就會買一次回家食 , 不過袁太而家唔食得雞 , 咁就整俾袁生食喇 , 之但係袁太經常有懷疑 , 連鎖店的製作過程會否乾淨及衛生呢 ......



最衛生最乾淨一定係自家製作 , 前幾日不停上網search下有冇有關食譜 , 雖然網上的做法都有好多唔同的步驟 , 不過話明麥樂雞 , 當然係用雞整喇 , 上網睇有人用雞胸肉 , 亦有人用雞脾肉 , 我就會選擇用雞脾肉 , 感覺會滑過用雞胸



雞脾肉我通常都會係日式超市買

而麥樂雞係用炸的方法製作 , 但我又想攪攪新意 , 一半用焗的方法 , 看看究竟炸好味d , 還是焗的好味d



呢個麥樂雞的製作唔太繁複 , 不過都用上大半日的時間  , 經過袁生試食後 , 兩款都覺得好味 , 如果要選擇一款的話 , 佢就比較喜歡炸個款 , 因為比較接近M記 , 而焗個款 , 袁生都覺得唔錯 , 可能加入麵包糠 , 焗完後變得好脆口 , 我為左整呢個麥樂雞 , 專登去M記攞甜酸醬回家呢 ^^



材料 : 雞脾肉 , 雞蛋 , 梳打粉 , 五香粉 , 黑胡椒碎 , 麵粉 , 麵包糠 , 油 , 鹽 , 生粉 , 水 , 甜酸醬(M記攞) , 芥辣醬 , 錫紙

 

雞脾肉切粒再剁成蓉放入大碗內 , 先加入五香粉 , 梳打粉 , 1隻雞蛋及醃料拌勻 , 再加入生粉拌勻後用手撻至起膠(約3-5分鐘) , 蓋上保鮮紙後放入冰箱冷藏1 1/2小時(不過最後袁太將雞肉冷藏左3小時)

冷藏數小時後從冰箱取出靜待10分鐘 , 焗爐用160C預熱10分鐘 , 將適量雞蓉用手壓成塊狀(大小隨意呢) , 期間將麵粉 , 1隻雞蛋及油放入大碗內拌勻 , 加水拌勻成麵糊 , 用隔篩隔一隔去粉粒

 
將六件的雞塊掃上麵糊 , 放入鑊中用慢火以半煎炸方式慢慢煎炸至兩面微黃色 , 盛起靜待10分鐘

將其餘五件的雞塊沾上蛋液(1隻雞蛋打散)及麵包糠 , 焗盤放上錫紙 , 將沾上蛋液及麵包糠的雞塊放上 , 再灑上少許麵包糠 , 放入焗爐用160C上火焗20分鐘 , 焗10分鐘後將雞塊取出反轉另一面 , 再入焗爐繼續用160C焗10分鐘 , 炸個款靜待10分鐘後再放入鑊中用中火慢慢煎炸至兩面金黃色即可

材料
雞脾肉300g , 雞蛋3隻 , 梳打粉1/4茶匙 , 五香粉1茶匙 , 黑胡椒碎 , 麵粉45g , 麵包糠 , 油1湯匙 , 鹽 , 生粉2茶匙 , 水30g , 甜酸醬(M記攞) , 芥辣醬 , 錫紙

醃料
鹽 , 黑胡椒碎



做法
1. 雞脾肉切粒再剁成蓉放入大碗內 

2. 先加入五香粉 , 梳打粉 , 1隻雞蛋及醃料拌勻 

3. 再加入生粉拌勻後用手撻至起膠(約3-5分鐘) 

4. 蓋上保鮮紙後放入冰箱冷藏1 1/2小時(不過最後袁太將雞肉冷藏左3小時) 

5. 冷藏數小時後從冰箱取出靜待10分鐘 

6. 焗爐用160C預熱10分鐘 

7. 將適量雞蓉用手壓成塊狀(大小隨意呢) 

8. 期間將麵粉 , 1隻雞蛋及油放入大碗內拌勻 , 加水拌勻成麵糊 

9. 用隔篩隔一隔去粉粒

10. 將六件的雞塊掃上麵糊 

11. 放入鑊中用慢火以半煎炸方式慢慢煎炸至兩面微黃色 

12. 盛起靜待10分鐘

13. 將其餘五件的雞塊沾上蛋液(1隻雞蛋打散)及麵包糠 

14. 焗盤放上錫紙 , 將沾上蛋液及麵包糠的雞塊放上 , 再灑上少許麵包糠 

15. 放入焗爐用160C上火焗20分鐘 

16. 焗10分鐘後將雞塊取出反轉另一面 , 再入焗爐繼續用160C焗10分鐘 

17. 炸個款靜待10分鐘後再放入鑊中用中火慢慢煎炸至兩面金黃色即可 




經過袁生試食後 , 炸同焗都好味 , 炸既味道比較接近M記 , 而焗既就比較脆口 , 總知兩款做法都好味道呢 ^^