<美的破壁機BL1188食譜> 黑芝麻杏仁茶

上次用美的破壁機整完袁太至愛的腰果露之後 , 家中個件麻煩友又係度嘈嘈閉 , 話今次論到整佢的至愛杏仁茶喎 , 頂~~~你唔係唔知我一向好討厭杏仁味嗎 ??? 咩杏仁茶 , 杏仁霜 , 杏仁餅我統統唔食 , 不過當然 , 袁太係犯賤的 , 大家都估到 , 就算我唔食 , 只要袁生開到口 , 我一定唔會say no ......



如果大家問袁太點解唔鐘意杏仁味 ??? 咁多位真的唔好意思 , sorry , 皆因我自己都唔知點解 , 總知由細到大我都好怕杏仁的味道 , 聞到已經想反胃 , 但如果杏仁入面加左其他野我就ok喎 , 譬如好似今次的杏仁茶 , 我知袁生一定要食原味既 , 但為左令到自己都有得食 , 就另外將黑芝麻用美的破壁機打成粉 , 再加入杏仁茶入面 , 咁杏仁茶就會有香濃的黑芝麻味 , 呢個我就食到喇 , 因袁太非常喜愛黑芝麻的

整左一煲當然食唔晒 , 就放入樽 , 一樽原味 , 一樽芝麻味入雪櫃雪凍 , 翌日凍食都唔錯 , 不過我還是喜愛熱食 , 呢個美的破壁機又係一個好幫手 , 下次又嘗試整咩食物好呢 ^^



材料 : 南杏 , 北杏 , 白米 , 黑芝麻 , 冰糖 , 水 , 隔篩 , 美的破壁機(BL1188)

南杏 , 北杏放入大碗內加水浸過面 , 白米用水沖洗乾淨瀝乾水份 , 加1/2杯水份量浸過面 , 連同南北杏靜待一晚 , 翌日將南北杏用水沖一沖洗及瀝乾

黑芝麻放入美的破壁機內 , 按點動數下將黑芝麻打碎成芝麻粉 , 先盛起 , 南北杏 , 白米連浸米水放入美的破壁機內 , 加入1000ml水 , 蓋上蓋 , 調較至豆漿功能 , 再按中間的開關製 , 會有時間顯示需時35分鐘 

破壁機最後10分鐘會開始加速 , 完成後會發出啤啤聲 , 將按製調去關 , 杏仁茶就完成 , 將杏仁茶用隔篩隔去粉粒入煲內 , 加入冰糖用慢火慢慢煮至冰糖溶 , 盛起杏仁茶入碗內 , 放上適量黑芝麻粉即可

材料
南杏200g , 北杏20g , 白米2湯匙 , 黑芝麻 , 冰糖 , 水1000ml , 隔篩 , 美的破壁機(BL1188)   



做法
1. 南杏 , 北杏放入大碗內加水浸過面 

2. 白米用水沖洗乾淨瀝乾水份 , 加1/2杯水份量浸過面 , 連同南北杏靜待一晚 

3. 翌日將南北杏用水沖一沖洗及瀝乾

4. 黑芝麻放入美的破壁機內 , 按點動數下將黑芝麻打碎成芝麻粉 , 先盛起 

5. 南北杏 , 白米連浸米水放入美的破壁機內 , 加入1000ml水 

6. 蓋上蓋 , 調較至豆漿功能 , 再按中間的開關製 , 會有時間顯示需時35分鐘 

7. 破壁機最後10分鐘會開始加速 

8. 完成後會發出啤啤聲 , 將按製調去關 , 杏仁茶就完成

9. 將杏仁茶用隔篩隔去粉粒入煲內 

10. 加入冰糖用慢火慢慢煮至冰糖溶 , 盛起杏仁茶入碗內 , 放上適量黑芝麻粉即可

  


用美的破壁機整杏仁茶非常方便又快捷 , 我知杏仁茶相當有益 , 加埋黑芝麻就更加香呢^^