咖哩手撕豬肉麵包盒

袁太某日訓醒想食咖哩 , 以往煮咖哩必然愛配雞 , 配牛腩牛筋 , 牛展的我 , 大家都知 , 而家基本上肉類只可以食豬肉 , 咁唯有整咖哩豬 ......



袁太每次煮咖哩一定會買呢個牌子的咖哩汁 , 不過個日搵得好苦 , 搵左3間超市先有貨

係急凍店買左幾條豬仔脾 , 加白酒 , 薯仔 , 甘旬炆下佢 , 白酒係上次煮燴飯時剩下的白酒, 炆完的豬仔脾去骨 , 將肉用手撕成條 , 咁食時就方便得多 , 另一個難題就係麵包方面 , 袁太初初以為間間麵包店都可以買未切的方包 , 開頭去第一間問唔俾買唔切的方包 , 第二間一條要成條買 , 好彩去到第三間可以買半條 , 咁就買半條喇 , 將炆好的咖哩手撕豬肉放入麵包盒內 , 灑上芝士碎焗至溶及金黃色 , 食時麵包脆卜卜 , 咖哩汁沾麵包真係好味到暈 , 今次只係用左約半個麵包 , 剩餘的留下做甜品嘆下呢 ^^



材料 : 麵包 , 豬仔脾 , 甘旬 , 薯仔 , 咖哩汁 , 芝士碎 , 黑胡椒碎 , 蒜頭 , 白酒 , 鹽 , 糖 , 水 , 美的早餐機(MZ-DSY18A)

豬仔脾解凍後用水沖一沖洗 , 抹乾水份 , 放入器皿內加少許鹽 , 黑胡椒碎拌勻靜待30分鐘 , 期間將薯仔去皮切件 , 甘旬去皮切件 , 蒜頭去衣拍扁 , 薯仔用水沖一沖洗及瀝乾

鑊中爆香蒜頭 , 放入豬仔脾煎至兩面轉色 , 加入白酒用中火煮滾 , 加入調味料及3杯水份量拌勻 , 中火煮滾後蓋上蓋轉慢火炆30分鐘

期間將薯仔放入美的早餐機的煎pan內 , 按<煎餅>功能將薯仔炒至微黃色 , 盛起瀝乾油份 , 豬仔脾炆30分鐘後逐一加入薯仔 , 甘旬 , 咖哩汁拌勻 , 蓋上蓋繼續用慢火炆15分鐘 , 再熄火焗30分鐘

 

麵包內的白麵包挖空 , 豬仔脾盛起去骨 , 將肉撕成條 , 放回咖哩內拌勻 , 咖哩手撕豬肉放入麵包盒內 , 灑上芝士碎 , 入焗爐最低層 , 用200C上下火焗10分鐘至表面芝士成金黃色 , 取出靜待10分鐘即可

 

 

材料 
麵包 , 豬仔脾4條 , 甘旬1條 , 薯仔2個 , 咖哩汁1罐 , 芝士碎 , 黑胡椒碎 , 蒜頭1/2個 , 白酒100ml , 鹽 , 糖 , 水3杯 , 美的早餐機(MZ-DSY18A)

調味料 
生抽 , 老抽 , 糖



做法
1. 豬仔脾解凍後用水沖一沖洗 , 抹乾水份 

2. 放入器皿內加少許鹽 , 黑胡椒碎拌勻靜待30分鐘 

3. 期間將薯仔去皮切件 , 甘旬去皮切件 , 蒜頭去衣拍扁 , 薯仔用水沖一沖洗及瀝乾

4. 鑊中爆香蒜頭 , 放入豬仔脾煎至兩面轉色 

5. 加入白酒用中火煮滾 , 加入調味料及3杯水份量拌勻 

6. 中火煮滾後蓋上蓋轉慢火炆30分鐘 

7. 期間將薯仔放入美的早餐機的煎pan內 , 按<煎餅>功能將薯仔炒至微黃色 

8. 盛起瀝乾油份

9. 豬仔脾炆30分鐘後逐一加入薯仔 , 甘旬 , 咖哩汁拌勻 

10. 蓋上蓋繼續用慢火炆15分鐘 , 再熄火焗30分鐘

11. 麵包內的白麵包挖空 , 豬仔脾盛起去骨 , 將肉撕成條 , 放回咖哩內拌勻 

12. 咖哩手撕豬肉放入麵包盒內 , 灑上芝士碎 

13. 入焗爐最低層  , 用200C上下火焗10分鐘至表面芝士成金黃色 

14. 取出靜待10分鐘即可 




咖哩香噴噴 , 手撕豬肉又滑 , 唔鞋口 , 麵包沾咖哩汁真係好味到停唔到口呢 ^^