芝士肉醬意粉

唔知大家喜唔喜愛肉醬意粉呢 ??? 唔講意粉 , 肉醬簡直係我家袁生的至愛 , 無論咩肉醬煎蛋飯 , 肉醬千層闊麵佢統統都愛 , 袁生係一個只要有肉醬就可以食幾碗飯的人 , 不過相反我就麻麻地愛肉醬 ......



可能感覺肉醬係一樣容易飽肚的食物 , 就算好肚餓 , 食兩三啖已經有少少頂胃(~哈~ 純粹袁太個人感覺) , 不過只要個麻煩友喜歡 , 袁太都會配合佢 , 遷就佢 , 實行做100%好老婆



何況呢排見袁生日日趕圖 , 由朝做到晚冇停手 , 有時見佢晝得唔滿意 , 發晒忟憎又發晒脾氣 , 都唔敢同佢講咁多野 , 所以袁太係冇咩可以幫到佢的情況下 , 煮佢喜愛的食物 , 希望可以令袁生開心番ddd , 令佢可以抖抖 , 放鬆一下 , 唔好俾自己咁大壓力 , 所以就決定整肉醬意粉俾袁生 , 希望佢食完之後 , 心情會變得好一點 , 其實肉醬本來唔打算配意粉 , 本應想配闊麵 , 因印象中以為雪櫃還有半盒闊麵 , 點知 ... 原來之前已經食晒 , 好彩還有包意粉未開封 , 今次唔用焗的方法 , 簡簡單單將肉醬淋在意粉上 , 再灑上芝士碎 , 因袁生係一個芝士怪 , 袁生成日話食過袁太整的肉醬 , 真係唔想食街外個d喎 , 真係氹到我好鬼開心呢 ^^



材料 : 免治牛肉碎 , 豬肉碎 , 蕃茄 , 煙肉 , 洋蔥 , 芹菜 , 茄膏 , 自家上湯(如沒有可用現成雞湯代替) , 芝士碎 , 意粉 , 鹽 , 黑胡椒碎 , 水 , 美的早餐機(MZ-DSY18A)

牛肉碎及豬肉碎放入大碗內加少許鹽 , 黑胡椒碎拌勻靜待30分鐘 , 蕃茄洗淨切粒 , 洋蔥去皮切粒 , 煙肉切細片, 芹菜莖切粒 , 用水沖一沖洗及瀝乾

 

煲內加入少許油燒熱 , 加入蕃茄 , 洋蔥及芹菜粒用中火拌炒數分鐘至出茄油 , 加入煙肉 , 牛肉碎及豬肉碎拌勻炒至肉轉色 , 逐一加入茄膏 , 上湯及水(500ml)拌勻 , 用中火煮滾後轉慢火蓋上蓋煮1小時(期間要不時攪拌以免黏底 , 蓋上蓋繼續用慢火煮) , 1小時後加少許鹽及黑胡椒碎拌勻調味 , 熄火蓋上蓋焗30分鐘成肉醬備用 

意粉放入早餐機的煲內加水 , 按<蒸 / 煮>功能 , 煮至意粉軟身 , 按包裝上的時間說明 , 蓋上蓋將時間調至10分鐘至意粉熟透 , 盛起瀝乾水份放入大碗內 , 加入2湯匙肉醬拌勻 , 再淋上適量肉醬 , 最後灑上芝士碎即可

材料
免治牛肉碎250g , 豬肉碎150g , 蕃茄3個 , 煙肉3片 , 洋蔥1個 , 芹菜1扎 , 茄膏2湯匙 , 自家上湯(如沒有可用現成雞湯代替)300ml , 芝士碎 , 意粉 , 鹽 , 黑胡椒碎 , 水500ml , 美的早餐機(MZ-DSY18A)



做法
1. 牛肉碎及豬肉碎放入大碗內加少許鹽 , 黑胡椒碎拌勻靜待30分鐘 

2. 蕃茄洗淨切粒 

3. 洋蔥去皮切粒 , 煙肉切細片, 芹菜莖切粒 , 用水沖一沖洗及瀝乾

4. 煲內加入少許油燒熱 , 加入蕃茄 , 洋蔥及芹菜粒用中火拌炒數分鐘至出茄油 

5. 加入煙肉 , 牛肉碎及豬肉碎拌勻炒至肉轉色 

6. 逐一加入茄膏 , 上湯及水(500ml)拌勻 

7. 用中火煮滾後轉慢火蓋上蓋煮1小時(期間要不時攪拌以免黏底 , 蓋上蓋繼續用慢火煮) 

8. 1小時後加少許鹽及黑胡椒碎拌勻調味 

9. 熄火蓋上蓋焗30分鐘成肉醬備用  

10. 意粉放入早餐機的煲內加水 

11. 按<蒸 / 煮>功能 , 煮至意粉軟身 

12. 按包裝上的時間說明 , 蓋上蓋將時間調至10分鐘至意粉熟透

13. 盛起瀝乾水份放入大碗內 , 加入2湯匙肉醬拌勻 , 再淋上適量肉醬 

14. 最後灑上芝士碎即可 




超級美味的芝士肉醬意粉 , 在家製作絕對唔難 , 好簡單呢 ^^