<美的陶瓷蒸燉寶MD8101F食譜> 冬瓜茶樹菇素翅燉雞湯

之前整碗仔翅時買左一包素翅回家 , 用剩還有小半包 , 唔想擺住冰箱的位置 , 所以要想辦法清埋佢 , 素翅呢樣食物對於袁太來說只會用作湯水或湯底之用 , 絕對唔會用來炒 , 因以前試過炒素翅 , 袁生話我炒得唔好 , 唔好食 , 從此就怕怕唔敢炒 ......



記得數年前用素翅配上南瓜 , 薯仔及海鮮粒煮湯 , 味道都唔錯 , 不過袁生話想飲中式湯 , 而且還想飲燉湯 , 燉湯多數會用雞 , 排骨或豬展 , 行經街市時見有新鮮雞殼賣 , 買左一隻回家配下呢樣 , 配下個樣 , 燉湯當然又係用美的蒸燉寶呢個好幫手 , 燉佢兩粒鐘左右 , 就有碗熱辣辣的燉雞湯俾袁生飲 , 袁生對呢個湯水相當滿意 , 大讚美味 , 呢款雞湯材料包括有冬瓜 , 素翅 , 金華火腿 , 茶樹菇 , 杞子同雞殼 , 真材實料的燉湯真係冇得輸 , 味道濃郁



大家都知袁太同雞雞已經絕交了 , 不過聞到咁香的味道 , 袁太最終忍唔住破戒試左ddd , 其實只係偷飲左一啖仔咁多多 , 哈 ... 點知條腰即刻痛 , 瀨晒野 , 翌日要即刻去醫院打止痛針 , 以後都怕怕唔敢再破戒 , 唔敢再偷食偷飲 , 要乖乖呢 ^^

材料 : 雞殼 , 茶樹菇(預先加水浸軟) , 冬瓜 , 金華火腿(浸熱水2分鐘) , 素翅(浸熱水2分鐘) , 杞子 , 熱水 , 鹽 , 美的陶瓷蒸燉寶(MD8101F)

雞殼放入煲內 , 加水用中火煮數分鐘至大滾出水 , 將雞殼沖一沖洗去碎骨及瀝乾水份 , 冬瓜去皮去籽切大粒 , 逐一將雞殼 , 金華火腿 , 冬瓜 , 茶樹菇及素翅放入美的陶瓷蒸燉寶的燉盅內 , 再加入熱水至滿 , 蓋上燉盅蓋 , 蒸燉寶的煲內加熱水至水位位置 , 放上蒸架 , 放上燉盅 , 蓋上煲蓋 , 先按<功能>鍵 , 調至養顏湯功能 , 時間調至2Hours , 再按<開始 / 取消>鍵 , 由佢燉 , 小心蒸氣口

燉至剩餘一小時後會有時間顯示 , 燉至時間到最後30分鐘時 , 加入杞子拌勻繼續燉 , 直至嗶嗶聲響代表燉完 , 會進入保溫模式 , 將雞殼取出起出雞肉 , 雞肉放回湯內拌勻 , 蓋上蓋焗30分鐘即可

材料
雞殼1個 , 茶樹菇(預先加水浸軟) , 冬瓜 , 金華火腿5片(浸熱水2分鐘) , 素翅(浸熱水2分鐘) , 杞子 , 熱水 , 鹽 , 美的陶瓷蒸燉寶(MD8101F)



做法
1. 雞殼放入煲內 , 加水用中火煮數分鐘至大滾出水 

2. 將雞殼沖一沖洗去碎骨及瀝乾水份 

3. 冬瓜去皮去籽切大粒 

4. 逐一將雞殼 , 金華火腿 , 冬瓜 , 茶樹菇及素翅放入美的陶瓷蒸燉寶的燉盅內 

5. 再加入熱水至滿 

6. 蓋上燉盅蓋 , 蒸燉寶的煲內加熱水至水位位置 , 放上蒸架 , 放上燉盅 

7. 蓋上煲蓋 , 先按<功能>鍵 , 調至養顏湯功能 , 時間調至2Hours

8. 再按<開始 / 取消>鍵 , 由佢燉 , 小心蒸氣口 

9. 燉至剩餘一小時後會有時間顯示 

10. 燉至時間到最後30分鐘時 , 加入杞子拌勻繼續燉

11. 直至嗶嗶聲響代表燉完 , 會進入保溫模式

12. 將雞殼取出起出雞肉 , 雞肉放回湯內拌勻 , 蓋上蓋焗30分鐘即可 




香濃的燉雞湯 , 味道濃郁美味 , 而且加入多多材料一齊燉 , 飲湯食渣絕對夠飽飽 , 天氣稍為寒冷時飲雞湯可以暖胃同補身呢 ^^